Jambyl oblysynda 2 adam túıneme juqtyryp aldy
TARAZ. QazAqparat – Jambyl oblysy Talas aýdanynda sibir jarasynyń 2 jaǵdaıy tirkeldi, dep habarlaıdy QazAqparat tilshisi.
Maýsym-shilde aılarynda aptap kezinde Jambyl oblysynda asa qaýipti juqpaly aýrýdy tasymaldaýshylar men qozdyrýshylardan zardap shegýdin 2 jaǵdaıy tirkeldi. Bul týraly oblys ákimdigi densaýlyq saqtaý basqarmasynyń baspasóz qyzmeti habarlady.
«Óńirde 257 adamdy kene shaǵyp, olar medıtsınalyq kómekke júgingen. Onyń 159-y - 14 jasqa deıingi balalar. Alaıda, bul ótken jyldyń osy kezeńimen salystyrǵanda 1,5 ese az bolǵanymen, ár turǵyn jeke bastyń saqtyq sharalaryn saqtaýdy esinen shyǵarmaýy tıis» delingen habarlamada.
Kene shaǵý boıynsha bıyl Taraz qalasynyń aýmaǵynda - 143, Baızaq aýdanynda - 29, Sarysýda – 28, Moıynqumda – 15, T.Rysqulov, Shý, Jambyl aýdandarynda - 9, Qordaıda – 7, Talasta – 6, Merkide – 2 jaǵdaıdan anyqtalyp otyr.
Ýly jándikten zardap shekkender 14 kún medıtsınalyq baqylaýda bolýy tıis.
Búginde keneden zardap shekken 257 adamnyń 188-i atalǵan merzimniń ótýine baılanysty baqylaýdan alynypty.
«Bıylǵy jyldyń ózinde qora-jaılar men tórt túlikten arnaıy brıgadanyń kómegimen 28 509 astam jándik alynyp, tekserýge jiberilgen. Zerttelgen 2595 keneniń 52-sinen qyrym qandy qyzbasynyń belgileri tabyldy» delingen baspasóz qyzmetiniń habarlamasynda.
