Jambyl oblysynda 2,7 myń úı jaryqsyz otyr

TARAZ. QazAqparat- Jambyl oblysynyń Shý aýdanynda 2799 úı birneshe kúnnen beri jaryqsyz otyr, dep habarlaıdy QazAqparat tilshisi.

1-4 sáýir aralyǵynda aýa raıy kúrt ózgerip, jeldiń jyldamdyǵy 16-25 m/s jetý saldarynan Shý aýdanynda birqatar nysanǵa zaqym kelip, elektr qýaty sónip qaldy.

Degenmen, aýdan ákimdiginiń baspasóz qyzmetiniń habarlaýynsha, ortalyqtan sý, gaz, jylý berý toqtatylǵan joq.

Qazirgi ýaqytta Qonaev aýylynda - 100 abonent, Belbasarda - 52, Birlikte - 353, Dýlatta - 400, Alǵada - 40, Balýan Sholaqta - 354, Tólebı aýylynda 1500 abonent elektr energııasynan ajyratylǵan.

Jalpy, jel saldarynan 22 elektr baǵanasy qulap, onyń 21-i qaıta qalpyna keltirildi.

Elektr júıelerin qalpyna keltirý boıynsha 16 brıgada jumys istep jatyr.

Sondaı-aq daýyldy jelden 7 mektep, birneshe meıramhana men dúkenniń ǵımarattaryna zaqym keldi.

Aýdanda arnaıy jumysshy toby qurylyp, keltirilgen shyǵyndar eseptelip jatyr.

Eske salaıyq, Jambyl oblysynyń Qordaı aýdanynda quıyndy jelge baılanysty tótenshe jaǵdaı jarııalanǵan bolatyn.

«31 naýryz kúni keshke qaraı jel bastalyp, búginge deıin qatty soǵyp jatyr. Kúnde keshke 10-ǵa deıin jel bolady. Aýa-raıy boljamyna saı, jeldiń jyldamdyǵy sekýndyna 27-28 metr. Keıbir kezde bul tipti 30-dan asyp jatyr. 3 mekteptiń, 1 balabaqshanyń shatyry ushyp ketti. Birshama órt te shyǵyp jatyr. Jel Sovhoz jáne Atar aýmaǵynda bolyp jatyr. Kolhoz eldi mekeniniń aýmaǵynda jel joq. Gaz qubyrlary men jaryq transformatorlary qulap jatyr», - dep túsindirdi Qordaı aýdany ákiminiń orynbasary Damıra Súgirbaı.