Jambyl oblysynda 19 eldi mekende sý tasqyny qaýpi tómendedi

TARAZ. QazAqparat – Jambylda júrgizilgen jumys nátıjesinde 19 eldi mekende sý basý qaýpi tómendedi. Bul týraly óńirlik kommýnıkatsııalar qyzmeti alańynda ótken brıfıng barysynda oblystyq TJD bastyǵy Ermek Mombaev aıtyp berdi, dep habarlaıdy QazAqparat tilshisi.

Spıkerdiń aıtýynsha, Jambyl oblysynda jalpy sý tasqyny qaterlerin aldyn alý boıynsha Jol kartasy jasalnǵan.

Oǵan engen 26 nysannyń búginde 25-inde jumys tolyǵymen aıaqtalypty.

Jol kartasyna sáıkes, júrgizilgen jumystar nátıjesinde, 19 eldi mekende sý basý qaýpi tómendegen.

Atap aıtqanda, Jambyl aýdany boıynsha «Dorojnık», «Maıskaıa» saıajaıy, Asa aýyly.

Al Baızaq aýdanynda Sarykemer, Qyzyl Juldyz jáne Dıhan aýyly. Qordaı aýdanynda Masanshy, Qasyq, Qalǵuty, Beriktas jáne Aral aýyly.

Talas aýdany Aqkól, Shakırov jáne Úsharal aýyldary, Merki aýdanynda Aqermen jáne Merki aýyly. Shý aýdanyndaǵy Býlanbaı, Orazaly jáne Aqsý aýylyna tabıǵı apattan tóner qaýip joq.

«Jol kartasynda oryndalmaǵan 1 nysan Taraz qalasynda. Jambyl jáne Baızaq aýdandarynyń eldi mekenderinde sý basý qaýpiniń aldyn alý úshin Talas ózeninde jalpy uzyndyǵy 25,4 shaqyrym jaǵalaýdy nyǵaıtý jumystaryn júrgizýge respýblıkalyq bıýdjetten qarajat bólinbeýine baılanysty oryndalmady. Atalǵan is-shara «2021-2023 jyldarǵa arnalǵan sý tasqynynyń aldyn alý jáne joıý jónindegi sharalar kesheni» Jol kartasyna engizildi. Qazirgi tańda, bul baǵytta jumystar sheshimin tabýda. Máselen, bıyl aýyl sharýashylyǵy obektilerin damytý baǵdarlamasy boıynsha 555,5 mıllıon teńge qarastyrylǵan, onyń 55, 5 mıllıon teńgesi jergilikti bıýdjetten bólinip, jumystar júrgizilýde», - dedi Ermek Mombaev.

Byltyrǵy jyldyń qyrkúıeginen osy sáýir aıyna deıin oblystaǵy gıdrotehnıkalyq qurylymdarǵa Shý-Talas basseındik ınspektsııasy, «Qazsýshar» RMK fılıaly men Jambyl sý qoımalary mekemeleri komıssııalyq tekserý júrgizdi.

Qorytyndysynda «Jambyl sý qoımalary» KMM menshigindegi 22 sý qoımalarynyń aǵymdaǵy jóndeý qajet ekendigin anyqtady.

Olardyń qatarynda Bóget№5, Kamennoe, Darbaza, Qyzyláýit, Shabaqty, STF, Mahandy-1, Aspara-1, Keńes, Lenınjol, Báıteli(Novoe), Aqqaınar, Jıenáli, Novoe, Aqkýmbez, Bazarbaı-1, Bazarbaı-2, Tastan, Tegistik, Aqermen1-2, Báıteli sý saqtaǵysh qoımalary bar.

Aıta ketý kerek, sý qoımalaryn qalpyna keltirý jumystary oblystyq tabıǵı resýrstar jáne tabıǵatty retteý basqarmasynyń moınynda.

Olar «Erekshe avarııalyq sý sharýashylyǵy qurylymdaryn qalpyna keltirý» bıýdjettik baǵdarlamasy boıynsha jumys júrgizýde.

Baǵdarlama boıynsha 72,8 mln teńge bólinip, 7 sý qoımaǵa aǵymdaǵy jóndeý jumysyn júrgizý josparlanǵan.