Jambyl oblysynda 18 kompıýterlik tomografııa jumys istep tur
TARAZ. QazAqparat – Jambyl oblysynda barlyǵy 18 kompıýterlik tomografııa apparaty jumys isteıdi, dep habarlaıdy QazAqparat tilshisi.
Jambyl oblysy aýmaǵynda jumys isteıtin barlyq 18 kompterlik tomografııa – qazirgi zaman talabyna saı, ınnovatsııalyq-sandyq úlgidegi zamanaýı qondyrǵy.
Koronavırýs ınfektsııasyna shaldyqqan naýqastardyń aýrý deńgeıin anyqtaýda zor múmkindik beretin kompıýterli tomografııa qurylǵylarynyń 8-i memlekettik, 10-y - jekemenshik medıtsınalyq ortalyqtarda ornalasqan.
Jaqynda ǵana Qordaı jáne Talas aýdandaryna da osyndaı zamanaýı apparat jetkizildi. Eki aýdanda buǵan deıin ondaı apparat bolmaǵan. Orta eseppen 1 apparat táýligine 96 naýqasty túsire alsa, al 18-i 1 728 adamdy qaraýǵa qaýqarly. Aldaǵy ýaqytta medıtsınalyq mekemelerge qosymsha taǵy 4 qurylǵyny alý josparlanyp otyr. Bul týraly oblys ákimdigi densaýlyq saqtaý basqarmasynyń baspasóz qyzmeti habarlady.
«Halyqqa kompıýterlik tomografııadan ótý úshin aldyńǵy jyldardaǵydaı apta buryn jazylyp, kezek kútýdiń nemese shalǵaı aýyldyq eldi mekennen qala ortalyǵyna sabylyp kelýdiń qajeti shamaly. Búginde barlyq emdeý mekemelerinde bar qurylǵalar halyqqa táýlik boıy, úzdiksiz qyzmet kórsetýde. Jeńildik sanatyndaǵy adamdar men múmkindigi shekteýli jandar jáne mindetti áleýmettik medıtsınalyq saqtandyrý júıesinde tirkeýde turǵan adamdar tegin tekserýden óte alady. Sondaı-aq, kelisimshartqa otyrǵan kez-kelgen emdeý mekemesiniń joldamasymen barǵan patsıentter de tegin dıagnostıkadan ótýge quqyly», - delingen habarlamada.
