Jambyl oblysynda 170 myń gektardan astam jer qaıta aınalymǵa qosyldy
TARAZ. QazAqparat – Jambyl oblysynda jyl basynan beri óńirdegi aýyl sharýashylyǵy maqsatyndaǵy 170 myń gektardan astam jer qaıta aınalymǵa qosylǵan, dep habarlaıdy QazAqparat tilshisi.
Qaıta aınalymǵa qosylǵan jerdiń basym bóligi jaıylym jáne shabyndyq jerleri. Degenmen, onyń 7 myń gektary bosalqy aýyl sharýashylyǵy maqsatyndaǵy, 7 myń gektary aınalymnan shyǵyp qalǵan egistik jerler bolsa, 6639 gektary sýarmaly egistik. Bul týraly oblys ákimdiginiń jer qatynastary basqarmasynyń toǵyz aılyq eseptik jıynynda aıtyldy. Aımaq basshysy Asqar Myrzahmetovke atalǵan basqarma basshysy Baqtııar Kópbosynov esepti merzimde atqarylǵan jumys týraly baıandap, saladaǵy ózekti máselelerge de toqtalyp ótti.
Jer qatynastary salasy boıynsha jyl basynda joǵary memlekettik organdar jáne oblys ákimdigi tarapynan berilgen tapsyrmalardy oryndaýǵa baǵyttalǵan 6 ındıkatorlyq kórsetkishter belgilense, bul kórsetkishterdiń denine qol jetkizilgen. Atalmysh basqarma basshysynyń aıtýynsha egistik jerlerdiń ıgerilýin kosmos arqyly monıtorıngileý baǵytynda «Qazǵarysh» mekemesimen kelisim shart barlyq aýdandarda uzartylyp, qosymsha 11 maman arnaıy kýrstan ótkizilgen.
Bul oraıda aǵymdaǵy jyly kosmostyq túsirilimderdi taldaý nátıjesi oblys aýdandarynda 35 myń ga egistik jerlerdiń ıgerilmeı qalǵandyǵyn kórsetip bergen. Al, jergilikti atqarýshy organdardyń málimetinshe ol kórsetkish bar-joǵy 9 myń gekterdy ǵana quraǵan.
«Bıyl jeti myń gektarǵa jýyq sýarmaly jer egistik kanaldardy jóndeý arqyly aınalymǵa qosyldy. Bul oraıda byltyr óńirimizde qurylǵan mehanıkalyq jasaqtyń eńbegin aıryqsha atap kórsetý kerek. Ótken jyly atalmysh jasaqtyń kómegimen Baızaq, Jambyl aýdandarynda 3 sý qoımasy men bógetteri jóndelip, Jambyl aýdanynda uzyndyǵy 1,5 shaqyrym kollektorly-drenajdy júıe qalpyna keltirilse, Jambyl, Moıynqum aýdandarynda uzyndyǵy 26,8 shaqyrymdy quraıtyn kanaldar tazalanǵan bolatyn. Nátıjesinde 1404 gektar jer sýmen qamtylǵan. Al, ústimizdegi jyldyń toǵyz aıynda Merki, Talas aýdandarynda 2 sý qoımasy men bógetteri jóndelip Jambyl, Moıynqum aýdandarynda uzyndyǵy 65 shaqyrymdy quraıtyn kanaldar tazalanyp, bes myń gektarǵa jýyq jer sýarmaly alqapqa aınalǵan»,-dedi Baqtııar Kópbosynov.
Aımaq basshysy aınalymnan shyǵyp qalǵan aýyl sharýashylyq jerlerdi qaıta uqsatýdyń mańyzdylyǵyna aıryqsha toqtalyp, onyń naqty esebi, soǵan oraı jospar-júıesi bolý kerektigin basa aıtyp, ol jerlerdi ıgerýdegi tıimdilikti arttyrýǵa barynsha den qoıý kerektigin eskertti. Asqar Isabekuly bul óz kezeginde oblys ekonomıkasyn nyǵaıtýǵa aıryqsha yqpal etetinin jetkizip, osy oraıda atqarylatyn jumystardyń jospar-kestesin ázirleýdi tapsyryp, oǵan tıisti basqarmalarmen qatar aýdan, aýyl ákimdikteriniń de barynsha atsalysýyn mindettedi. Aldaǵy ýaqytta osy turǵyda arnaıy alqaly jıyn ótkizý josparǵa qoıyldy.
