Jambyl oblysynda 170 bıznes sýbektisiniń nesıe tólemi jyl sońyna shegerildi
TARAZ. QazAqparat – Jambyl oblysy kásipkerlerdiń nesıe tólemi jyl sońyna deıin shegerildi. Bul týraly Jambyl oblysy ákimdiginiń kásipkerlik jáne ındýstrıaldy- ınnovatsııalyq damytý basqarmasynyń basshysy Aspandııar Seısebaev ÓKQ alańynda
ótken brıfıngte aıtty, dep habarlaıdy QazAqparat tilshisi.
Jambyl oblysynda 170 shaǵyn jáne orta bıznes sýbektileriniń ekinshi dárejeli bankter arqyly nesıelendirilgen qoldanystaǵy 306 kelisimsharty boıynsha 16 156,8 mln teńge kólemindegi nesıe somalary 2020 jyldyń sońyna deıin keıinge shegerilgen.
Brıfıng barysynda Aspandııar Seısebaev bolashaqta mektepter men kolledjderde azamattardyń kásipkerlik júrgizýge qatysty saýatyn arttyrý úshin «Kásipkerlik negizderi» páni oqytylatyndyǵyn da aıta ketti.
Atalǵan salada azamattardyń saýatynyń azdyǵy salany damytýda sheshilýi qajet basty másele bolyp otyr.
Sondaı-aq, basqarma basshysy kásipkerlik salasynyń keıingi jyldardaǵy kórsetkishterine de toqtaldy.
«Aıta keteıik, Jambyl oblysynda sońǵy 10 jylda shaǵyn jáne orta kásipkerlikten óndirilgen ónim kólemi 520,4 mlrd teńgeni quraǵan. Osydan on jyl buryn bul kórsetkish 3 esege tómen, ıaǵnı 167,3 mlrd teńge bolatyn. Sońǵy 10 jylda belsendi shaǵyn jáne orta kásipkerler sany oblysymyzda 37,1 myńnan 69,9 myńǵa jetip, eki esege jýyq ósken. Bul saladaǵy jumyspen qamtylǵandar sany 127,4 myń adamǵa jetip otyr»,- dedi A.Seısebaev.
