Jambyl oblysynda 166 júrgizýshi jol-kólik oqıǵasy ornynan qashyp ketken
TARAZ. QazAqparat – Jyl basynan beri Jambyl oblysynda 166 kólik júrgizýshisi jol-kólik oqıǵasy ornyn tastap ketken, dep habarlaıdy QazAqparat tilshisi.
Aǵymdaǵy jyl basynan beri kólik júrgizýshileriniń jol-kólik oqıǵasy ornynan qashyp ketýdiń 66 deregi tirkeldi. Júrgizilgen izdestirý is-sharalary barysynda polıtsııa qyzmetkerleri 134 júrgizýshini anyqtap, jaýapkershilikke tartty, qalǵandarynyń turatyn jeri anyqtalýda.
Oblystyq Polıtsııa departamenti baspasóz qyzmetiniń málimetinshe, júrgizýshiler kóbine moınyna jaýapkershilik almas úshin boı tasalaıdy. Al onyń sońy kólik quralyn basqarý quqyǵynan aıyrýǵa ákelip jatady.
«Zań talaptary boıynsha jol-kólik oqıǵasy ornyn tek zardap shegýshini óziniń kólik quralymen jaqyn mańdaǵy emdeý mekemesine jetkizgen jaǵdaıda ǵana qaldyrýǵa jol beriledi. Bul rette, óziniń aty-jónin, memlekettik tirkeý nómirlik belgisin habarlaı otyryp (jeke basyn kýálandyratyn qujatty nemese júrgizýshi kýáligin jáne kólik quralynyń tirkeý qujatyn kórsete otyryp), keıinnen oqıǵa ornyna qaıta oralady.
Qurmetti Jambyl oblysynyń turǵyndary men qonaqtary! Polıtsııa departamenti Sizderge polıtsııa qyzmetkerleri kelgenge deıin jol-kólik oqıǵasynyń ornyn tastap ketpeý qajettigin eskertedi. Eger siz JKO kýágeri jáne onyń basy-qasynda bolsańyz, «102» pýltine dereý habarlaýdy suraımyz», - delingen vedomstvo habarlamasynda.
