Jambyl oblysynda 16 shaqyrymdyq aınalma jol paıdalanýǵa berildi
TARAZ. QazAqparat – Jambyl oblysynda uzyndyǵy 16,1 shaqyrymdy quraıtyn «Taraz qalasynyń Qyrǵyzstan shekarasyna ońtústik aınalma avtojolynyń» qurylysy tolyǵymen aıaqtaldy,- dep habarlaıdy QazAqparat tilshisi.
Merdiger – «Kazahdorstroı» JShS jol salý boıynsha qurylys jumystaryn 2019 jyly bastaǵan bolatyn. Jobany iske asyrýǵa «Nurly jol» baǵdarlamasy aıasynda 3,5 mıllıard teńge qarastyrylǵan.
«Avtomobıl joldarynyń yńǵaıly jáne keń jelisi aımaqtyń ekonomıkalyq damýyna da yqpal eteri sózsiz. Kórshiles Qyrǵyzstan turǵyndary bizdiń oblysymyzdaǵy tranzıttik jol arqyly ótedi. Osy oraıda júrgizýshilerge yńǵaıly bolý úshin jáne qaýipsizdik deńgeıin arttyrý úshin aınalma jol qurylysy 2019 jyly bastalǵan bolatyn. Bul eki el – Qazaqstan men Qyrǵyzstan arasyndaǵy saýda qatynastarynyń artýyna da oń áser etedi dep senemin. Sondaı-aq, 16 shaqyrymdyq jol boıynda kásipkerlik nysandary salynyp, jańa jumys oryndary ashylatyn bolady, - dedi Jambyl oblysynyń ákimi Berdibek Saparbaev óz sózinde.
Aımaq basshysy merdiger kompanııaǵa qurylystyń sapasy úshin alǵys aıtty.
«Kóptegen júrgizýshiler Qyrǵyzstanǵa Taraz qalasy arqyly ótýge májbúr bolyp keldi, bul uzaq ýaqytty alatyn. Qalany aınalyp ótetin jańa baǵyt kem degende bir saǵattyq ýaqytty únemdeýge múmkindik beredi. Sonymen qatar, iri júk kólikteri burynǵydaı oblys ortalyǵy men Jambyl aýdanynyń jol bólikterin zaqymdamaıtyn boldy»,- deıdi kólik júrgizýshi Sultan Ahmetjan.
Jambyl aýdanynyń Qurmetti azamaty Sabrı Asanov oblys basshylyǵyna halyqtyń qajettiligine beı-jaı qaramaǵany úshin rızashylyǵyn jetkizdi.
«Birneshe eldi meken osy mańǵa jaqyn jerde ornalasqan. Endi aýyr júk mashınalary aýyl turǵyndarynyń mazasyn almaıdy», - dedi ol.
Aıta keteıik, búgingi tańda Taraz qalasynyń 70 myńǵa jýyq turǵyny «Almaty-Shymkent» baǵytyndaǵy temir jol jelisiniń arǵy betinde turady. Qalanyń eki bóligi arasyndaǵy kólik qatynasy Abaı kóshesinde ornalasqan jalǵyz jol ótkeli arqyly júzege asyp kelgen. Sońǵy jyldary kólik qozǵalysy qarqyndylyǵynyń 2-3 esege ósýine baılanysty qoldanystaǵy jalǵyz jol ótkeli kólik aǵymyn ıgere almaı, saldarynan keptelister men jol kólik oqıǵalarynyń oryn alýy jıilep ketken bolatyn. Osy máseleni sheshý maqsatynda Aısha bıbi kóshesindegi temir joldy qıyp ótetin qurylysy aıaqtalmaǵan jol ótkeli qaıta jańǵyrtylyp, jobanyń jalǵasy retinde respýblıkalyq mańyzy bar «Taraz-Ótmek Qyrǵyzstan shekarasy» avtojolyna janasatyn jańa atalǵan aınalma jol qurylysy júrgizildi.
Aınalma jol oblys ortalyǵy joldaryndaǵy kólik aǵynyn azaıtýǵa, Taraz qalasy men Jambyl aýdanynyń eldi mekenderi turǵyndarynyń kólik qatynasyn qamtamasyz etýge septigin tıgizedi.
