Jambyl oblysynda 157 mektepte polıtsııa ınspektory jetispeıdi
TARAZ. QazAqparat – Jambyl oblysyndaǵy 157 mektepte polıtsııa ınspektory jetispeıdi. Bul týraly oblystyq Polıtsııa departamenti ótkizgen «Bala qaýipsizdigi – barshaǵa ortaq másele» taqyrybyndaǵy oblystyq ata-analar jınalysynda aıtyldy, dep habarlaıdy QazAqparat tilshisi.
Aıta keteıik, búginde oblysta 442 memlekettik mektep, 4 túzetý oqý orny, 4 keshki jáne 7 memlekettik emes mektep bar.
Qoǵam talqysyndaǵy ózekti máseleni kótergen jıynǵa Jambyl oblysy ákiminiń orynbasary Nurjan Kalenderov jáne Taraz qalasy ákiminiń orynbasary Kenjebek Oljabaı, sondaı-aq oblystyq Bilim basqarmasynyń qyzmetkerleri, oblystyq Ata-analar komıtetiniń músheleri, mektep dırektorlary men orynbasarlary, Qamqorshylyq keńester, jeke kúzet uıymdarynyń ókilderi qatysty.
Osy taqyryptaǵy jınalys bir mezgilde Taraz qalasynda jáne oblystyń 10 aýdanyndaǵy polıtsııa bólimderiniń birinshi basshylarymen ótkizildi.
Óńirdiń bas polıtseıi Arman Orazalıevtiń aıtýynsha, 5 mektepte kámelet jasyna tolmaǵandardy qadaǵalaıtyn ınspektorlar qyzmettik mindettterine saı bolmaı shyqqan. Sol sebepti qazir bilim ordasynda barlyq ınspektordyń biliktiligin jetildirý júrgizilip jatyr.
Sondaı-aq jıynda beınebaqylaý kameralaryn kóbeıtý jaıy da sóz boldy. Qazir oblystaǵy barlyq mektepte 5300-ge jýyq kamera ornatylǵan. Aldaǵy ýaqytta qosymsha 4 myń beınebaqylaý qurylǵysyn ornatý josparlanǵan. Bilim oshaqtaryn arnaıy mamandandyrylǵan kúzet qyzmetimen qamtamasyz etý de kún tártibindegi másele bolyp otyr.
«Biz qazir kezekshilik patrýldik qyzmetti kúsheıttik. Ekıpajdar mektep aýmaǵyna barady. Ondaǵy jaǵdaıdy baqylaıdy. Bilim uıasyndaǵy ınspektorlarmen kún saıyn baılanysyp otyrady. Bul sharalardy mindetti túrde tańerteń, túste jáne keshte júzege asyramyz», - dedi Arman Orazalıev.
Sondaı-aq, basqosý barysynda oqýshylardyń qaýipsizdigin qamtamasyz etýdi kúsheıtý úshin birqatar usynystar jasaldy. Olar – mektep ǵımarattaryna bógde adamdardyń kirmeýin jáne aýlalarynda quqyq buzýshylyqqa jol bermeý úshin arnaıy kúzet mekemelerimen shartqa otyrý, kireberiske ótkizý týrnıketterin ornatý, ata-analar jınalystaryn udaıy túrde uıymdastyrý, «Qaýipsiz mektep joly» aıasynda mektepke keler joldarynyń syzbasyn jasap, kezekshilik uıymdastyrý, sabaq ýaqytynda sebepsiz júrgen oqýshylardyń júrýin qatań baqylaýǵa alý, sabaq bolmaǵan jaǵdaıda ata-analarǵa oqýshynyń erte ketkeni týraly mindetti túrde habarlaý.
«Polıtsııa tarapynan kámeletke tolmaǵandarmen jáne olarǵa qatysty jasalatyn qylmystardyń aldyn alý boıynsha jumystar júıeli túrde júrgizilip keledi. Alaıda, bul máselede tek polıtsııanyń qyzmeti jetkiliksiz. Balalardyń bos ýaqytyn qalaı ótkizýi, mektepke kelmegen jaǵdaıda ne isteıtini, ǵalamtor jelilerinde qandaı aqparattardy qaraıtyny, kimmen aralasatyny týraly, birinshiden, onyń ata-analary, ustazdary únemi nazarda ustaýy kerek. Sondyqtan, bala qaýipsizdigin qamtamasyz etýde barlyq tıisti tulǵalardy jaýapkershilikpen qarap, polıtsııamen birlese jumys isteýge shaqyramyn», - dedi oblystyń bas polıtseıi.
