Jambyl oblysynda 150-den astam adam keneden zardap shekti
ASTANA. QazAqparat - Kún ysyǵaly beri Jambyl oblysyna qarasty aýdandarda kenelerdiń belsendiligi arta tústi. Bul jándik kongo-qyrym qandy bezgegin taratýshy sanalady, dep habarlaıdy QazAqparat.
Aıta keterligi, kúni keshe ǵana Sarysý aýdanynda Ortalyq aýdandyq aýrýhananyń ınfektsııalyq bólimshesine kongo-qyrym qandy bezgegine shaldyǵý kúdigimen Jaıylma aýdanynyń 60 jastaǵy turǵyny jatqyzylǵan bolatyn.
Jambyl oblysy ákimdiginiń baspasóz qyzmeti taratqan málimetke sáıkes, óńir basshysy Kárim Kókirekbaevtyń tóraǵalyǵymen ótken jıyn barysynda aımaqtyq qyzmetterdiń kongo-qyrym qandy bezgeniniń aldyn alýǵa daıyndyq máselesi men maldar men aýmaqtarda kenege qarsy dárileý jaıy qaraldy.
Jambyl oblysy ákimdigi veterınarııa basqarmasynyń basshysy Ospan Berdııarovtyń aıtýynsha, óńirde 3,9 myń sharshy shaqyrym aýmaq, 21298 aýla jáne 598 myńnan astam bas mal kenege qarsy dárilenýi qajet. Degenmen kenege qarsy dárilengen toǵytpalarǵa maldardy túsirý problema bolyp otyr.
«Oblystyń barlyq sharýashylyqtarynda toǵytpalar bolǵan kezde qoı men eshki jylyna eki ret túsiriletin. Al qazirgi ýaqytta oblysta ne bári 125 toǵytpa bar jáne onyń tek 34-i ǵana kongo-qyrym qandy bezgeginiń tabıǵı oshaqtarynda ornalasqan. Barlyq aýdandarǵa toǵytpalardyń úlgilerin jiberdik. Aýdandardyń jáne sharýashylyqtardyń basshylaryna maldarǵa arnalǵan toǵytpalar men sebezgilerdi jóndeý men satyp alýǵa qarajat tabýǵa keńes berdik», - dedi Ospan Berdııarov.
Al oblystyq qoǵamdyq densaýlyqty saqtaý departamentiniń jetekshisi Berik Jarqynbekovtiń aıtýynsha, óńir turǵyndary arasynda kongo-qyrym qandy bezgegine shaldyǵý derekteri jyl saıyn artyp kele jatyr.
«Tek sońǵy 2 jylda ǵana kene shaqqannan keıin medıtsınalyq kómekke júgingen adamdar sany 2,5 ese artty. 2015 jyly 600 adam bolsa, 2016 jyly 1470-ten astam, al bıylǵy jyly qazirdiń ózinde 150 adam kómekke júgindi. Olardyń barlyǵy da medıtsınalyq baqylaýǵa alyndy, aýrýdyń klınıkalyq belgileri joq», - dedi ol.
Óz kezeginde oblys ákimi Kárim Kókirekbaev kórshi elderden keletin maldarǵa baqylaýdy qatańdatýdy tapsyrdy.
«Áıteýir bireýdiń aýyratyndyǵyn kútip otyra berýdiń qajeti joq. Aldyn alý jumystaryn júrgizip, aýrý maldardy aldyn ala anyqtap, emdeý qajet. Kórshi oblystardan jáne elden ákelinetin malǵa qatań baqylaý bolýy tıis», - dedi óńir basshysy.
Jambyl oblysynda alǵash ret 1982 jyly tirkelgen kongo-qyrym qandy bezgeginiń tabıǵı oshaq aýmaǵy 136 esege 200-den 27,1 myń sharshy shaqyrymǵa deıin ulǵaıǵan
