Jambyl oblysynda 15 bilim berý uıymynyń lıtsenzııasy ýaqytsha toqtatyldy
TARAZ. QazAqparat - Jambyl oblysynda 15 bilim berý uıymynyń lıtsenzııasy 6 aıǵa toqtatyldy. Bul týraly dúısenbi kúni Óńirlik kommýnıkatsııalar qyzmetinde ótken brıfıngte aımaqtyń Bilim salasyndaǵy baqylaý departamentiniń basshysy Dámesh Úskimbaeva málimdedi. Sondaı-aq ol bilim salasyndaǵy zań talaptarynyń oryndalýy jóninde baıandady, dep habarlaıdy QazAqparat «Jambyl» telearnasyna silteme jasap.
Departament ókilderi bilim berý uıymdarynda elimiz zańnamalarynyń, normatıvtik quqyqtyq aktileri men jalpyǵa mindetti standarttardyń oryndalýyna tekseris júrgizgen. Nátıjesinde, 42 bilim berý uıymy ishinara tekserilip, anyqtalǵan buzýshylyqtar boıynsha 15 bilim berý uıymynyń lıtsenzııasy 6 aıǵa deıin toqtatyldy.
Sondaı-aq atap ótilgendeı, bilim berý qyzmetin lıtsenzııalaý boıynsha «E-lıtsenzııalaý» Memlekettik derekter qory» aqparattyq júıesi arqyly barlyǵy 387 ótinish túsken. Olardy qaraý kezinde bir ótinish negizinde bastaýysh mektepke bas lıtsenzııa, 42-si boıynsha lıtsenzııaǵa qosymsha berilgen. Qalǵan 191 ótinishti qanaǵattandyrýdan bas tartyldy.
«Aıta ketý kerek, búginde Bilim jáne ǵylym mınıstrliginiń tapsyrmasyna sáıkes oblysta qurylǵan ata-analar qaýymdastyǵynyń chatyna 1073 ata-ana qosylǵan. Departament osy chat jáne basqa da áleýmettik jeli paraqshalary arqyly bilim salasyndaǵy ózgerister men jańalyqtar týraly aqparattar jarııalap, túsindirý jumystaryn udaıy júrgizip otyrady», - dedi Jambyl oblystyq Bilim salasyndaǵy baqylaý departamentiniń basshysy Dámesh Úskimbaeva.
