Jambyl oblysynda 14 myńnan astam jańa jumys orny quryldy
«Jumyspen qamtýdyń jol kartasy» memlekettik baǵdarlamasy óz kezeginde Jambyl oblysyndaǵy turǵyndardy jumyspen qamtamasyz etýdiń jáne kezdesip otyrǵan áleýmettik máselelerdi sheshýdiń tıimdi quralyna aınaldy.
Óńirde atalǵan baǵdarlama aıasynda 831 jobany júzege asyrý josparlanǵan bolatyn, onyń ishinde 180 joba áleýmettik nysandardyń ınfraqurylymyn damytýǵa, 200 joba – turǵyn úı kommýnaldyq sharýashylyqty, 327 joba – ınjenerlik-kólik ınfraqurylymyn damytýǵa, 124 joba eldi mekenderdi abattandyrýǵa baǵyttaldy», dep atap ótedi baspasóz qyzmeti.
Sondaı -aq oblys boıynsha baǵdarlama sheńberinde josparlanǵan jobalar negizinde 19 599 jańa jumys ornyn qurý kózdelgen. Jumyspen qamtylǵan jumysshylardyń keminde jartysy jumyspen qamtý ortalyqtary arqyly jumysqa ornalasýy tıis. Búgingi tańda 821 jobany iske asyrý bastalǵan desek, oǵan 14 myńnan astam adam, onyń ishinde jumyspen qamtý ortalyqtary arqyly 7 myń adam tartylǵan.
Baǵdarlama turǵyn úı máselesin sheshýge de óz úlesin qosýda. Onyń sheńberinde 706 páterlik 12 turǵyn úıdi paıdalanýǵa berý josparlanǵan, bul turǵyn úı kezegindegilerdiń baspana máselesin 2 paıyzǵa tómendetedi dep kútilýde.
«Jumyspen qamtýdyń jol kartasyn» iske asyrý nátıjesinde óńir boıynsha materıaldyq-tehnıkalyq baza jańartylyp, densaýlyq saqtaý men sport nysandarynyń qol jetimdilik deńgeıi artady. 20 myńnan astam aýyl turǵyndary taza aýyz sýmen qamtylyp, ortalyqtandyrylǵan sýmen jabdyqtalǵan turǵyndar úlesi 72 paıyzdan 75,4 paıyzǵa deıin óspek. Jaqsy jáne qanaǵattanarlyq jaǵdaıda joldardyń úlesi 59,5 paıyzdan 77,2 paıyzǵa deıin, abattandyrylǵan aýlalar úlesi 9,7 paıyzdan 31 paıyzǵa deıin artýy kózdelgen.
Sonymen qatar, Qordaı aýdanyndaǵy Masanchı, Sortóbe, Býlar batyr, Qarakemer aýyldary gazdandyrylady. Tabıǵı gazben 50 myńnan astam adam qamtamasyz etilmek.
