Jambyl oblysynda 14 myńnan astam adam qan tapsyrady
Búginde respýblıka boıynsha qan qyzmetin 19 uıym júzege asyrady. Onyń ishinde transfýzıologııa ǵylymı-óndiristik ortalyǵy men respýblıkalyq qan ortalyǵy – respýblıkalyq deńgeıdegi ortalyqtar bolsa, 15 qan ortalyǵy oblystyq jáne Almaty men Shymkent qalalaryndaǵy ortalyqar qalalyq deńgeıde qyzmet kórsetedi.
2022 jyly elimiz boıynsha qan ortalyqtaryna júgingen donorlardyń jalpy sany – 292 425 adam. Bul – 2021 jylmen salystyrǵanda 4 paıyzǵa kóp.
Al, Jambyl oblystyq qan ortalyǵynyń dırektory Gýlam Ýmarovtyń aıtýynsha, oblysta jyl saıyn 14 myńnan astam adam qan tapsyrady. Onyń ishinde birinshi ret qan tapsyrýǵa kelgen jáne donatsııalaýǵa jiberilgen bastapqy donorlardyń úlesi – shamamen 29 paıyz, al qalǵan donorlar 1-3 jyl ishinde 1 ret qaıtalap keletin qaıtalama donorlar sanatyna jatady. Jylyna 3 nemese odan da kóp ret qan tapsyrýǵa daıyn turaqty donorlar sanatynda 250 adam tur.
«Jylyna qan ortalyǵy qannyń ártúrli komponentteriniń shamamen 25 myń dozasyn daıyndaıdy. Qan synaý bólimshesi jylyna 250 myńnan astam zerthanalyq zertteýler júrgizedi, onyń ishinde jylyna 2 ret taldaý nátıjeleriniń dáldigine, durystyǵyna jáne jınaqtylyǵyna sapany baqylaý úshin respýblıkalyq baǵalaýǵa qatysady.
Munymen qosa, qan ortalyǵy 24 emdeý-profılaktıkalyq uıymdy qan komponentterimen qamtamasyz etedi, olardyń arasynda iri kardıologııalyq klınıkalar bar. Keıingi 3 jylda medıtsınalyq uıymdarda qannyń ártúrli komponentteriniń shamamen 51 myń dozasy quıyldy. Bul – 10 myńnan astam naýqastyń ómiri saqtaldy degen sóz», - deıdi Gýlam Ýmarov.
Buǵan deıin Jambyl oblysynyń 10 dárigeri shetelde oqytylatynyn habarlaǵan bolatynbyz.