Jambyl oblysynda 1300 shaqyrymnan astam jol jóndelýde
TARAZ. QazAqparat – Aǵymdaǵy jyly Jambyl oblysynda jol salasy boıynsha 1145 jobany júzege asyrý josparlanyp, oǵan 30,2 mlrd. teńge qarastyrylǵan,- dep habarlaıdy QazAqparat tilshisi.
Onyń ishinde «Nurly jol» baǵdarlamasy aıasynda 8,3 mlrd. teńgege 23 joba, «Aýyl - El besigi» - baǵdarlamasy 2,4 mlrd. teńgege 84 joba, «Jumyspen qamtýdyń jol kartasy» - 15,2 mlrd. teńgege 843 joba kózdelgen. Bul avtojol jobalaryn iske asyrý 5 myńnan astam jańa jumys oryndaryn ashýǵa múmkindik berýde. Bul týraly oblys ákiminiń baspasóz qyzmeti habarlady.
Óńirde 1 346,2 shaqyrym avtomobıl joldaryn qaıta jańartý jáne jóndeý jumystary josparlanǵan desek, onyń 180,5 km - oblystyq mańyzy bar, 139,3 km - aýdandyq mańyzy bar, 1026,3 km - eldi meken kósheleri.
Sondaı-aq, respýblıkalyq bıýdjet qarajaty esebinen 3 iri joba iske asyp jatqandyǵyn aıtyp ótý kerek. Olar: «Taraz-Sarykemer-Túımekent-Aqsholaq», «Taraz-Jetibaı-Tegistik-Oıyq» oblystyq avtomobıl joldaryn qaıta jańartý jáne «Qyrǵyz Respýblıkasynyń shekarasyna qaraı uzyndyǵy 16,1 km. bolatyn Taraz qalasynyń ońtústik aınalma avtojolynyń» qurylysy.
«Aǵymdaǵy jyldyń aıaǵyna qaraı jaqsy jáne qanaǵattanarlyq jaǵdaıda jergilikti mańyzy bar avtomobıl joldarynyń úlesin 85 paıyzdan 90 paıyzǵa, eldi meken kóshelerinin 59,5 paıyzdan 77,2 paıyzǵa deıin arttyrý mindeti qoıylyp otyr», - deıdi oblystyq jolaýshylar kóligi jáne avtomobıl joldary basqarmasynyń basshysy Baqytjan Jánibekov.
Avtojoldardy salý jáne jóndeý jumystaryn júrgizý kezinde sapany baqylaýdy tapsyrys berýshimen birlesip «Jol aktıvteriniń Sapa ortalyǵy» ShJQ RMK turaqty túrde júzege asyrady. 2020 jyldyń birinshi jarty jyldyǵynda mamandar 53 nysandy tekserip, 17 buzýshylyqty anyqtaǵan.
Avtomobıl joldarynyń qurylysy, qaıta qurý jáne kútip ustaý baqylaý boıynsha monıtorıngti «Sapaly jol - Adaldyq alańy» jobasy aıasynda Sybaılas jemqorlyqqa qarsy is-qımyl departamenti, «Jambyl-Adaldyq alańy» jobalyq keńsesi arqyly júrgizýde.
Sonymen qatar, jóndeý-qurylys jumystaryn «Nur Otan» partııasy, «Jas Otan» jastar qanaty belsendilerinen, oblystyq sáýlet, qala qurylysy jáne qurylys basqarmalary men bólimderiniń mamandarynan qurylǵan mobıldi top ókilderi de qadaǵalap otyrady.
