Jambyl oblysynda 1300 shaqyrymnan astam jol jóndeledi
TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken apparattyq keńeste joldardy jóndeý jáne jylytý maýsymynyń qorytyndysyna qatysty máseleler saralandy, dep habarlaıdy QazAqparat óńir ákiminiń baspasóz qyzmetine silteme jasap.
Aımaq basshysy ekonomıkany damytý úshin jol jelisiniń mańyzdylyǵyn aıryqsha atap ótip, aǵymdaǵy jyly oblystyq jáne aýdandyq mańyzy bar avtojoldardy jóndeýge 30 mıllıard teńgeden astam qarjy qarastyrylǵanyn jetkizdi.
Oblystyq Jolaýshylar kóligi jáne avtomobıl joldary basqarmasynyń basshysy Baqytjan Jánibekovtiń aıtýynsha, 122 joba jergilikti jáne respýblıkalyq bıýdjetten qarjylandyrylýda. Sondaı-aq, 84 joba «Aýyl – El besigi» baǵdarlamasy, 845 joba «Jumyspen qamtýdyń jol kartasy» baǵdarlamasy aıasynda júzege asyrylatyny josparlanǵan jáne 96 joba Qordaı aýdanynyń kóshelerin ortasha jóndeýge baǵyttalǵan. 74 nysan boıynsha memlekettik satyp alý konkýrstary aıaqtalsa, 22 nysanda óndiristik jumystar bastalǵan.
Bólingen qarjy esebinen 1334,6 km jolǵa jóndeý jumystaryn júrgizý josparlanýda. Atap aıtar bolsaq, 1310,5 km jol ortasha jóndeýden ótedi desek, onyń ishinde 180,5 km oblystyq, 136,5 km aýdandyq mańyzy bar avtojoldar jáne 1017 km eldi mekenderdiń kósheleri. Sondaı-aq, 6,1 km joldy qaıta jańǵyrtý jáne 18 km jergilikti mańyzy bar joldar men eldi mekenderdegi kóshelerdi salý kózdelgen.
«Barlyq aýdan ákimderi óz aýmaǵynda ornalasqan asfaltbetondy zaýyttarmen kelisim-shart jasasyp, jóndeýdi qajet etetin joldar tizimin, qajetti materıaldardyń kólemin jasaýy qajet. Jol aktıvteriniń sapa ortalyǵy, tehnıkalyq qadaǵalaý organdary ózderine júktelgen fýnktsııalardy tıisinshe oryndap otyrǵan joq. Sapasyz asfalttiń saldarynan joldardyń jaǵdaıy kóńil kóńshitpeıdi. Sondaı-aq, kólik ınspektsııasy úlken júk kólikteriniń qozǵalysyn baqylaýdy kúsheıtýi kerek», - dep oblys ákimi tıisti tulǵalarǵa naqty tapsyrmalar júktedi.
Berdibek Saparbaev qoǵamdyq kólikterdi gazǵa kóshirý jónindegi jumystardyń álsizdigin alǵa tartyp, ol Taraz qalasynyń ekologııasyna jáne onyń turǵyndarynyń densaýlyǵyna oń áser tıgizetinin basa aıtty. Sonymen qatar, elektrondyq bılettendirýdi engizý sharalaryn jandandyrý talap etildi.
