Jambyl oblysynda 13 jasar qyz ógeı aǵasynan júkti bolyp qalǵan
TARAZ. QazAqparat –Jambyl oblysy T.Rysqulov aýdanynda 13 jasar jasóspirim qyz ógeı aǵasynan júkti bolyp qalǵan, dep habarlaıdy QazAqparat tilshisi.
Aǵymdaǵy jyldyń 6 maýsymynda T.Rysqulov aýdanynyń polıtsııa bólimine aýdandyq ortalyq aýrýhanadan 13 jastaǵy jasóspirimniń 22 aptalyq júktilikpen qaralǵany týraly habarlama túsken. Bul týraly oblystyq polıtsııa departamentiniń baspasóz qyzmeti málimdedi.
«Atalǵan derek boıynsha T.Rysqulov aýdandyq polıtsııa bólimi QR Qylmystyq kodeksiniń 120-baby 4-bóligimen (jas balaǵa qatysty zorlaý) sotqa deıingi tergep-tekserý amaldaryn júrgizip, tıisti saraptamalar taǵaıyndaǵan» delingen vedomstvo habarlamasynda.
Sondaı-aq, habarlamada júrgizilgen tergeý amaldarynyń nátıjesinde jáne saraptama qorytyndysyna sáıkes balanyń bıologııalyq ákesi anyqtalyp, jábirlenýshiniń ógeı aǵasy bolyp keletin 22 jastaǵy azamat qamaýǵa alynǵany aıtylǵan.
Qazirgi tańda qylmystyq is qadaǵalaýshy prokýrordyń bekitýi boıynsha aıyptaý aktisimen sotqa joldanǵan.
