Jambyl oblysynda 1200 saýyn sıyrǵa arnalǵan sút fermasy salynyp jatyr
TARAZ. QazAqparat - Jambyl oblysynyń Jýaly aýdanynda 1200 bas saýyn sıyrǵa arnalǵan taýarly-sút fermasy salynyp jatyr, dep habarlaıdy Habar24.kz.
Fermanyń jobalyq quny 1 mlrd teńge. Bul qarjyǵa qurylys jumystary men fermaǵa qajetti gollandııalyq qural jabdyqtar satyp alynady. Qazir qurylystyń 75 protsenti aıaqtalǵan. Seriktestiktegi saýyn sıyrǵa arnalǵan keshende 15 adam qurylys jumystaryn júrgizip jatyr. Sodan keıin gollandııalyq tehnologııany ornatý joparlanǵan. Eger joba iske assa, kelesi jyly shetelden 1200 bas asyltuqymdy sútti sıyrlar ákelinedi.
«Qurylystyń jalpy aýmaǵy 3 gektardy quraıdy. Mundaǵy soǵylyp jatqan eki keshende 600 bas saýyn sıyrlar bolady. Al úshinshisi avtomattandyrylǵan sút saýý zaly men mal tóldetýge arnalǵan oryn bar. Qazir seriktestiktegi mal basynyń sany eki myńǵa jýyqtaǵan. Onyń 800-den astamy asyl tuqymdy sıyrlar. Munda kúnine 7 tonna sút alynady. 150 adamdy turaqty jumyspen qamtyp otyrǵan seriktestik jańa ferma iske qosylsa, jumysshylar qataryn taǵy 50 adammen tolyqtyramyz dep otyr»,-deıdi qurylys ýchaskesiniń bastyǵy Maksım Sladkov.
Al Jýaly aýdany ákimdiginiń aýylsharýashylyq bóliminiń sektor meńgerýshisi Sábıt Nurlybaev 1200 basqa arnalǵan sút taýarly fermany 2020 jyly tolyqtaı aıaqtaý josparlanyp otyrǵandyǵyn aıtady.
«Onyń ishindegi qondyrǵylardyń barlyǵy gollandııalyq tehnologııamen engiziledi, endi ol qondyrǵynyń barlyǵy tolyqtaı bitken jaǵdaıda bul taýarly sút fermada 50 adamdaı jumyspen tolyqtaı qamtamasyz etiledi. Seriktestiktiń byltyrǵy óndirgen ónim kólemi 844 mıllıon teńgeni quraǵan. Negizgi basymdyq sút pen et baǵyty bolǵandyqtan malǵa qajetti jem-shópti de ózderi daıyndaıdy. Búgingi kúni 1000 gektar alqapqa arpa bıdaı, 400 gektar jerge kóp jyldyq shóp egilgen»,-deıdi sektor meńgerýshisi.
