Jambyl oblysynda 110 mln teńgeniń malyn urlaǵan kúdiktiler ustaldy
Qordaı aýdandyq polıtsııa bólimine iri qara mal ósirýmen aınalysatyn sharýa qojalyǵynyń 46 jastaǵy tóraǵasy júginip, mal urlyǵy jóninde shaǵymdanǵan. Ol 2021 jyldyń qazanynan osy jyldyń tamyzyna deıingi aralyqta joǵalǵan asyl tuqymdy sıyrlaryn urlaýǵa malshysy men kórshi sharýa qojalyq basqarýshysynyń qatysy bar dep baıandaǵan. Osy derekke qatysty QR QK-niń 188-1-baby 4-bóligimen (Mal urlyǵy) sotqa deıingi tergeý amaldary bastaldy.
Aýdandyq polıtsııa qyzmetkerleri jedel-izdestirý jumystarynyń nátıjesinde 1972 jylǵy Shý aýdanynyń jáne Almaty qalasynyń turǵyndaryn ustady. Kúdiktiler kinásyn tolyq moıyndady.
Tergeý barysynda kúdiktiniń biri mal urlyǵy týraly aldyn ala josparlaǵany anyqtaldy. Osy maqsatta ol eki tabyn maldy ádeıi qosyp jiberip, biriktirip baqqan. Keshkilik basqa malshymen maldy bólip, sońynda birnesheýin ózine qaraı bildirtpeı aıdap jiberip otyrǵan. Túnde olardy tabynnan bólip alyp, kórshi sharýa qojalyǵyna aıdap aparatyn bolǵan, al onyń jetekshisi urlanǵan maldy satqan. Osylaısha, uzaq ýaqyt boıy barlyǵy 137 iri qarany urlaǵan. Keltirilgen jalpy shyǵyn kólemi – 109 600 000 teńge.
Qazir kúdiktiler ýaqytsha ustaý ızolıatorynda otyr. QR Qylmystyq kodeksiniń talaptary boıynsha múlki tárkilenip, 7 jyldan 12 jylǵa deıingi merzimge bas bostandyǵynan aıyrý túrindegi jaza qarastyrylady.