Jambyl oblysynda 11 jasar bala attraktsıonnan qulap ketti
TARAZ. QazAqparat – Jambyl oblysynda 11 jasar bala attraktsıonnan qulap ketti, dep habarlaıdy QazAqparat tilshisi.
Áleýmettik jelide Qordaı aýdanynda11 jasar balanyń attraktsıonnan qulap ketkendigi jóninde vıdeo tarady. Degenmen, jasóspirimniń ata-anasy medıtsınalyq kómekke júginbegen. Ol týraly oblystyq Polıtsııa departamentiniń baspasóz qyzmeti málim etti.
«10 tamyzda áleýmettik jelilerdi monıtorıngileý kezinde Jambyl oblysy Qordaı aýylynyń saıabaǵynda 2010 jyly týǵan kámeletke tolmaǵan balanyń attraktsıonnan qulap ketkendigi týraly jarııalanym anyqtaldy (vıdeo qosa berilgen). Tekserý barysynda balanyń qulaýy bıylǵy 9 tamyzda oryn alǵandyǵy belgili boldy. Alaıda, ata-analar aýrýhanaǵa jáne quqyq qorǵaý organdaryna shaǵymdanǵan joq. Qazirgi ýaqytta oqıǵanyń barlyq qatysýshylary anyqtaldy», - delingen habarlamada.
Atalǵan fakti protsessýaldyq sheshim qabyldaý úshin Qordaı aýdandyq polıtsııa bóliminde tirkeýge alynǵan.
