Jambyl oblysynda 11 nysandy qamtıtyn etno-mádenı keshen salynýda

Búginde keshendegi 8 nysan boıynsha qurylys-montajdaý jumystary aıaqtalyp, árleý-bezendirý jumystary qyzý atqarylýda. Barlyǵy 500-ge jýyq qurylysshy, 30-dan asa tehnıka jumyldyrylǵan. Árleý jumystary Samarqan stılindegi kirpishterimen júrgizilýine baılanysty Ózbekstannan arnaıy mamandar tartylýda. Infraqurylymmen qamtý sharalary tolyǵymen aıaqtalǵan. Jalpy tórt gektar aýmaqty quraıtyn ortalyqtaǵy qurylys jumystary tolyǵymen jeltoqsan aıynyń basynda márege jetetini josparlanǵan.

«Shahrıstan» etno-mádenı kesheniniń qurylys basyna barǵan BAQ ókilderiniń nazary birden qaınaǵan tirshilikke aýdy. Bir tusta úlken júk kólikteri túrli qurylys materıaldaryn tıep aǵylyp jatsa, ekinshi jaǵynda jumyskerler ýaqytpen sanaspaı eńbek etýde. Mine, osylardyń qolymen erteńgi urpaqqa qalar qundy jádigerlerimizdiń irgesi qalanyp jatyr degen oıǵa shomdyq. Al aldymyzdan qarsy alǵan shtab basshysy Rahmanqul Baıtelıev birden atqarylyp jatqan jumystarmen tanystyra ketti.

«Mundaǵy qurylys aǵymdaǵy jyldyń maýsym aıynyń onynan bastalǵan bolatyn. Negizgi qurylysty «KDSM» men «Ómirzaq» jaýapkershiligi shekteýli seriktestikteri júrgizýde. «KDSM» jaýapkershiligi shekteýli seriktestigi buǵan deıin «Jeńis» saıabaǵyndaǵy, «Dańq» alleıasyndaǵy, sondaı-aq Atshabardaǵy «Jastar» alleıasyndaǵy qurylys basynda bolǵan. Sondyqtan bul seriktestikke úlken senim artylyp, osy alyp joba berilip otyr. Al «Ómirzaq» jaýapkershiligi shekteýli seriktestigi óńirdegi birqatar tasjoldardy jańartýda júıeli jumysymen kózge túsip, «Shahrıstan» tarıhı-mádenı keshenine bul seriktestik te jumyldyrylyp otyr. Odan bólek, josparly jumysqa demeý bolyp jatqan 8-9 seriktes kompanııa bar», – deıdi Rahmanqul Baıtelıev.

«Shahrıstan» tarıhı-mádenı kesheninde 11 nysan boı kóteredi dep josparlanǵan. Olardyń qatarynda tarıhı-ólketaný mýzeıi, «Rýhanııat jáne tarıhtaný» ortalyǵy, qolónershiler sheberhanasy, kórkemsýret galereıasy, amfıteatr, «Saǵat» stellasy, Arbat-1, 2, 3 nysandary bar. Aıta keteıik, mundaǵy qurylysqa qajetti materıaldardyń 80 paıyzy otandyq óndiris oryndarynan jetkizilýde. Qalǵany Samarqand kirpishi, glazýr atty tósenishter Qytaı men Ózbekstan memleketterinen ımporttalady. Olarmen arnaıy kelisimshart jasalyp, eń sapaly materıaldar paıdalanylýda.

Jalpy «Shahrıstan» tarıhı-mádenı kesheniniń aýmaǵyna 45 myń tas tósenish tóselip, alty sýburqaq ornatylýda. Sondaı-aq «MART» saýda ortalyǵynyń artyndaǵy 350 metr kanal boıyna kishi arhıtektýralyq nysandar salynyp, kelýshilerge jaıly jaǵajaı jasalmaq.