Jambyl oblysynda 1069 sport nysany turǵyndarǵa qyzmet kórsetedi
ASTANA. QazAqparat - Jambyl oblysynda 1069 sport nysany turǵyndarǵa qyzmet kórsetedi. Bul týraly Ortalyq kommýnıkatsııalar qyzmetiniń óńirlik fılıalynda ótken brıfıngte Jambyl oblysy ákimdiginiń dene shynyqtyrý jáne sport basqarmasynyń basshysy Gamlet Qaınarbekov aıtty, dep habarlady oblys ákiminiń baspasóz qyzmeti.
Gamlet Tórehanulynyń aıtýynsha, búgingi kúnge oblys boıynsha turǵyndardyń sportpen júıeli túrde shuǵyldaný úshin qoljetimdi 1069 sport nysany anyqtalyp otyr. Onyń 442-i - Taraz qalasynda, 627-i - aýdandarda ornalasqan. Atalǵan sport nysandarynda turǵyndardyń, onyń ishinde jastar men jasóspirimderdiń sportpen turaqty shuǵyldanýy úshin arnaıy kesteler jasaldy. Kesteler jergilikti buqaralyq aqparat quraldarynda jáne oblys ákimdiginiń saıttarynda jarııalanyp keledi.
Ótken jyly oblys boıynsha sport nysandarynyń jalpy sany 2013 qurady. Onyń ishinde 19 stadıon, 665 fýtbol alańy, 548 sport zaly, 662 sport alańshalary jáne 119 basqa da nysandar bar.Sonymen qatar, 2015 jyly Taraz qalasy men aýdandarda 2614 sporttyq is-shara ótkizilip, oǵan 540 myńnan astam adam tartyldy. Onyń ishinde salamatty ómir saltyn nasıhattaý baǵytynda 1547 sporttyq is-shara uıymdastyryldy. Oǵan 299 myńnan astam adam qamtyldy.
Sonymen qatar, sońǵy jyldary ulttyq sport túrlerin qaıta jańǵyrtýǵa basymdyqtar berilýde. Ótken jyly, ulttyq sport túrleri boıynsha ótkizilgen 611 is-sharaǵa 67 myńnan astam adam qatysty. Al keshendi 456 is-sharaǵa 172 myńnan asa adam qamtyldy.
