Jambyl oblysynda 100 ga aýmaqta qýraǵan shóp órtendi
ASTANA. QazAqparat - Jambyl oblysynda 100 ga aýmaqta qýraǵan shóp órtendi, dep habarlaıdy QazAqparat QR ІІM Tótenshe jaǵdaılar komıtetine silteme jasap.
Oqıǵa keshe, 4 mamyr kúni shamamen 14 saǵat 57 mınýt kezinde bolǵan. Órtengen aýmaq Jambyl oblysynyń Baızaq aýdanyndaǵy orman jáne janýarlar álemin qorǵaý memlekettik mekemesine («Belqudyq-Qaramatý» bóligi) tıesili. Munda qýraǵan shóp pen butalar órtengen. Jalyn sharpyǵan aýmaq aldyn ala málimetter boıynsha 100 gektardy qurap otyr.
Órt sóndirýge Baızaq aýdanyndaǵy orman jáne janýarlar álemin qorǵaý memlekettik mekemesiniń 16 tehnıkasy men 50 jumysshysy, sondaı-aq oblystyq Tótenshe jaǵdaılar departamentiniń 56 qyzmetkeri men 5 tehnıkasy jumyldyryldy.
Tótenshe jaǵdaılar komıteti baspasóz qyzmetiniń málimetinshe, ázirge órttiń sóndirilgeni jóninde aqparat túspegen.
