Jambyl oblysynan Astanaǵa 200 tonna aýyl sharýashylyǵy ónimi jetkiziledi
TARAZ. QazAqparat - Jambyldyq sharýalardyń ónimi tıelgen avtokerýen elordaǵa eki kúndik jármeńkege jol tartty, dep habarlaıdy «QazAqparat» HAA tilshisi Jambyl oblysy ákimdiginiń baspasóz qyzmetine silteme jasap.
Jambyldyq aýyl sharýashylyǵy taýarlaryn óndirýshiler jármeńkesi 2017 jyldyń 22-23 sáýir kúnderi Astananyń «Alataý» sport kesheni aýmaǵynda ótedi. Onda jalpy quny 156 mln teńgeni quraıtyn 201 tonnadan astam aýyl sharýashylyǵy taýarlary usynylady. Astanalyqtar jármeńkede et jáne sút, jemis pen kókónis, shujyq, un, balyq ónimderin, jarmalar men ósimdik maılaryn satyp ala alady.
Atap aıtqanda, jambyldyqtar 15 tonna jylqy eti, 7 tonna taýyq eti, 11 tonna shujyq ónimderi, 21,2 tonna sút ónimderi, 5 myń dana jumyrtqa, 5 tonna qaraqumyq, 5 tonna kúrish, 1,5 tonna kondıterlik ónimder men 6 tonna makaron ónimderi, 5,5 tonna ósimdik maıy, 5 tonna qant, 0,5 tonna tuz, 7 tonna balyq, 2,5 tonna bal, 2 tonna keptirilgen jemis jáne 103,5 tonna jemis-jıdek pen kókónis ónimderin ákele jatyr. Jármeńkede usynylatyn taýar baǵalary naryq baǵasynan 8-20% tómen bolady.
Sondaı-aq, bul kúnderi Jambyl oblysy fılarmonııasynyń ónerpazdary astanalyqtarǵa kontserttik baǵdarlamalaryn usynady.
Astana men Almaty qalalarynda jambyldyq aýyl sharýashylyǵy taýarlaryn óndirýshiler jármeńkesin ótkizý dástúrge aınaldy, dep atap ótti Jambyl oblysy ákiminiń baspasóz qyzmeti.
