Jambyl oblysynan Aqtóbege azyq-túlik tıelgen avtokerýen jóneltildi
ASTANA. QazAqparat - Búgin óńiraralyq yntymaqtastyqty nyǵaıtý maqsatynda Jambyl oblysynan azyq-túlik tıelgen avtokerýen Aqtóbe qalasyna jóneltildi.
Jambyldyq taýar óndirýshiler Aqtóbege ákelgen ónimderin 2017 jyldyń 18-19 naýryzynda arnaıy uıymdastyrylǵan jármeńkede saýdalaıtyn bolady, dep habarlaıdy óńir basshysynyń baspasóz qyzmeti.
Eki kúndik aýyl sharýashylyǵy jármeńkesinde jalpy quny 105,5 mıllıon teńgeni quraıtyn 177 tonnadan astam aýyl sharýashylyǵy taýarlary usynylady. Onyń ishinde 25 tonnaǵa jýyq et ónimderi (jylqy, shoshqa, taýyq etteri), 10 tonna shujyq ónimderi, 13 tonna sút ónimderi, 5 myń dana jumyrtqa, 1,5 tonna kondıterlik ónimder men 6 tonna makaron ónimderi, 10 tonna qant, 0,5 tonna tuz, 7 tonna balyq, 2 tonna bal jáne 80 tonna jemis-jıdek pen kókónis ónimderi bar.
Jármeńkede usynylatyn taýar baǵalary naryq baǵasynan 8-20 paıyzǵa tómen bolady dep kútilýde. Sondaı-aq, bul kúnderi óńirimizdiń dúldil ónerpazdary aqtóbelikterge kontserttik baǵdarlamalaryn usynady.
Óńiraralyq yntymaqtastyqty nyǵaıtý maqsatynda uıymdastyrylǵan issapardy oblys ákimi K. Kókirekbaevtyń ózi bastap barady. Eki kúndik jumys sapary barysynda qos oblys arasyndaǵy tyǵyz qarym-qatynas ornatý, aýyl sharýashylyǵy, óndiris, mádenıet salalary boıynsha ekijaqty memorandýmdarǵa qol qoıylady dep kútilýde.
