Jambyl oblysynan 3 myń jyldyq tarıhy bar qazan tabyldy
TARAZ.QazAqparat - Jambyl oblysynan osydan 3 myń jyl buryn qoldanylǵan qazan tabyldy, dep habarlaıdy QazAqparat tilshisi.
Kóne jádigerdi Besaǵash aýylynyń mańynan Ertaı esimdi azamat qabir qazyp jatyp taýyp alǵan.
Sherhan Murtaza atyndaǵy rýhanııat jáne tarıhtaný ortalyǵynyń dırektory, tarıhshy- arheolog Saýran Qalıev Besaǵashqa arnaıy baryp, tarıhı jádigermen tanysty.
Tarıhshy kóne qazan bizdiń zamanymyzǵa deıingi V-III ǵasyrdaǵy saq dáýirine jatatynyn aıtady. Qola men qalaıynyń qosyndysynan jasalǵan qazannyń boıy – 70 sm, dıametri – 66 sm.
«Qazan tabylǵan mańda ortaǵasyr qalashyǵy – «Aqtóbe» eldi mekeniniń orny bar. Biraq, qazan temir dáýirine jatatyndyqtan, Aqtóbeniń tarıhy da sonaý erte temir dáýirinen bastalýy múmkin. Bul aýmaqta osy ýaqytqa deıin keshendi túrde eshqandaı arheologııalyq ǵylymı-zertteý jumystary júrgizilmegen. Osy jádigerdiń tabylýynan soń, Jambyl oblysynyń Shý-Talas óńirindegi erte orta ǵasyrlyq jáne temir dáýirine tán nysandarda keshendi túrde ǵylymı-zertteý júrgiziledi dep úmittenemiz. Sondyqtan erte qola men temir dáýirine qatysty kenjelep qalǵan zertteý jumystaryna kóńil bóliný kerek«, – deıdi tarıhshy-arheolog Saýran Qalıev.
Tarıhshy qazan erneýindegi oıý-órnektiń geometrııalyq dáldikpen jasalǵanyna qarap, saq mádenıetindegi taıpalardyń matematıkalyq esepteýlerdi myqty meńgergendigin shamalaıdy. Al oıý-órnek nyshandary qazannyń aýzy men syrtqy betine shyǵarylyp jasalýy molshylyqtyń belgisi.
Qazan Besaǵash aýylyndaǵy mektep murajaıyna berildi.
Buǵan deıin Jambyl oblysynda mýzeıge Túrgesh zamanyndaǵy tıyndar tartý etilgenin jazǵan bolatynbyz.
