Jambyl oblysyna Tatarstan dárigerleri keldi
TARAZ. QazAqparat – Jambyl oblysyna Tatarstannan bir top dárigerler keldi. Olardyń maqsaty - medıtsınalyq kómek kórsetý, koronavırýs ınfektsııasy men pnevmonııany emdeý boıynsha tájirıbe almasý, dep habarlaıdy QazAqparat tilshisi.
Tatarstan dárigerleri otyrǵan ushaq keshe keshke Tarazdyń Áýlıe-Ata halyqaralyq áýejaıyna kelip qondy. Delegatsııany oblystyq densaýlyq saqtaý basqarmasynyń basshysy Marat Jumanqulov jáne «Taraz» ÁKK»UK» AQ basqarma tóraǵasy Oljas Karjaýov kútip aldy.
Kelgen dárigerlerdiń qatarynda dáriger-ınfektsıonıst, anestezıolog-reanımatolog, epıdemıolog jáne ambýlatorııalyq-emhanalyq qyzmettiń mamandary bar.
Búgingi kúni óńirde koronavırýstyq ınfektsııamen jáne pnevmonııamen syrqattanýshylyq jaǵdaıynyń turaqtaný úrdisi baıqalǵanyna qaramastan, sheteldik áriptesterdiń tájirıbesi de óz nátıjesin beredi dep kútilýde.
Marat Jumanqulovtyń aıtýynsha, Tatarstannan kelgen mamandar koronavırýs pen pnevmonııa aımaǵyndaǵy emdeý hattamalarymen tanysyp, jergilikti dárigerlerge konsýltatsııalyq jáne ádistemelik kómek kórsetpek.
- Kelgenderdiń barlyǵy joǵary sanattaǵy bilikti mamandar. Olar oblystyq densaýlyq saqtaý júıesiniń, koronavırýs jáne pnevmonııamen aýyratyn naýqastardy emdeýmen aınalysatyn uıymdardyń jumysymen tanysatyn bolady. Bul aýrýhanalardan bólek emhanalyq nysandarǵa, ortalyq aýdandyq aýrýhanalarǵa da barýy josparlanǵan. Reseı Federatsııasynda kovıdti emdeýdiń jaqsy tájirıbesi qalyptasty. Meniń oıymsha, reseılik mamandardyń kelýi bizge keıbir máselelerdi qaıta qarap, osy baǵyttaǵy jumystardy jaqsarta túsýge múmkindik beredi, - dedi M. Jumanqulov.
- Bul eki jaqty sapar. Biz bireýge birdeńe úıretý úshin emes, koronavırýstyq ınfektsııany emdeýdegi tájirıbelerimizdi salystyrý, aýyr naýqastardy kútý modeli, medıtsınalyq kómek kórsetý qurylymynyń qalaı uıymdastyrylǵanyn kórý, óz tájirıbemizdiń tıimdi tustarymen bólisý maqsatynda keldik, - dedi Tatarstan Respýblıkasy Densaýlyq saqtaý mınıstrliginiń Respýblıkalyq klınıkalyq onkologııalyq dıspanseriniń anestezıolog-reanımatology Aleksandr Vanıýshın.
Al, Oljas Qarjaýovtyń aıtýynsha, Tatarstan Respýblıkasy basshylyǵymen dárigerler arasynda ǵana emes, sonymen qatar eki eldiń bıznes ókilderi arasynda da ekijaqty yntymaqtastyq týraly kelisim ornatylǵan.
- Ázirge pandemııaǵa baılanysty bul kelisim tolyǵymen júzege aspaı otyr. Bolashaqta karantın aıaqtalyp, álemdegi jaǵdaı turaqtanǵan kezde biz Tatarstanǵa tájirıbe almasý maqsatynda jambyldyq kásipkerlerdi, onyń ishinde farmatsevtıkalyq kompanııalardyń ókilderin, dárihanalar jelisiniń ıelerin jáne taǵy basqalardy jiberýge nıettenip otyrmyz, - dep túsindirdi O.Qarjaýov.
Aıta ketý kerek, bul shara oblys ákimi Berdibek Saparbaevtyń Tatarstan Prezıdenti Rýstam Mınnıhanovpen kelisimi boıynsha Reseı Federatsııasyndaǵy Qazaqstan Elshiliginiń jáne memleket qaıratkeri Imanǵalı Tasmaǵambetovtiń qoldaýymen uıymdastyrylǵan.
