Jambyl oblysyna «Spýtnık V» vaktsınasynyń 5,2 myń dozasy jetkizildi
TARAZ. QazAqparat – Jambyl oblysyna koronavırýsqa qarsy ekpeniń ekinshi kezeńi úshin, ıaǵnı muǵalimderdi egýge «Spýtnık V» vaktsınasynyń 5250 dozasy jetkizildi. Bul týraly Óńirlik kommýnıkatsııalar qyzmetiniń aqparat alańynda ótken brıfıngte oblystyq Densaýlyq saqtaý basqarmasynyń basshysy Áset Qalıev aıtty, dep habarlaıdy QazAqparat tilshisi.
Jambyl oblysynda vaktsınalaýdyń 1-shi kezeńi boıynsha 850 medıtsına qyzmetkeri reseılik «Spýtnık V» vaktsınasynyń 1-komponentimen egildi. Olar osy aralyqta ekinshi ret, ıaǵnı 21 kúnnen keıin «Spýtnık V» vaktsınasynyń 2-komponentin aldy.
Aımaqtyń bas dárigeriniń aıtýynsha, vaktsınadan keıin adamdardan keri áserler baıqalmaǵan. Al 2 naýryzda «Qaraǵandyfarm» zaýyty bazasynda óndirilgen «Spýtnık V» vaktsınasynyń 5250 dozasy Shymkent qalasy arqyly Jambyl oblysyna jetkizildi. Qazir atalǵan preparattar vaktsınalaýdyń 2-kezeńin ótkizý úshin Densaýlyq saqtaý basqarmasynyń qoımasynda tur. Jalpy ekpeniń 2-shi kezeńinde vaktsına jalpy bilim beretin mektepterdiń, birinshi kezekte bastaýysh synyptardyń muǵalimderine salynady. Alǵashqy kezeńnen tys qalǵan medıtsına qyzmetkerleri de qamtylatyn bolady.
Vaktsınanyń túsýine qaraı ekpeniń úshinshi kezeńinde stýdentter, bilim berý mekemeleriniń, mektepke deıingi balalar mekemeleriniń, medıtsınalyq-áleýmettik mekemelerdiń, quzyrly qurylymdardyń qalǵan barlyq qyzmetkerleri, sondaı-aq halyq sanaǵymen aınalysatyn qyzmetkerler jáne sozylmaly aýrýlary bar adamdar qamtylatyn bolady.
«Búgingi tańda koronavırýs ınfektsııasyna qarsy vaktsınalaýdyń 1 jáne 2-kezeńin ótkizý úshin oblysta 20 emdeý mekemesi, onyń ishinde Taraz qalasynyń 9, Shý qalasynyń jáne oblystyń 10 aýdandyq emhanalary jumys isteýde. Barlyq jumyldyrylǵan emhanalarda egý jumystaryn júrgizý sanıtarlyq-epıdemıologııalyq normalar men erejelerdiń talaptaryna sáıkes júzege asyrylady» — dedi, Á. Qalıev.
Aıta ketý kerek, jospar boıynsha Jambyl oblysynda bıyl vaktsınanyń túsýine qaraı 18 jastan asqan 593 700 adam ekpe jasata alady. Bul – oblys halqynyń jalpy sanynyń 52 paıyzy degen sóz. Budan basqa, keıinnen halyqtyń qosymsha osal toptaryn qosa otyryp, kontıngentti keńeıtý josparlanýda.
Buǵan deıin habarlaǵanymyzdaı, búgin óńirdiń bilim salasy qyzmetkerlerine vaktsına jasaý bastalyp ketti.
