Jambyl oblysy: Úıge gaz tartý 83 myń teńgege deıin tómendedi
ASTANA. QazAqparat - Jambyl oblysynda tabıǵı gazdy aýlaǵa kirgizý quny 150 myń teńgeden 83 myń teńgege tómendetildi, dep habarlaıdy QazAqparat tilshisi.
Oblys ákimi Asqar Myrzahmetovtiń aıtýynsha, qazirgi ýaqytta óńirdegi 377 eldi mekenniń 181-i gazben qamtylǵan.
«Gaz tartylǵan aımaqtarda da turǵyndardyń 11 paıyzy nemese 88 myń adam gaz torabyna qosyla almaı otyr. Sebebi, gaz qubyryn kósheden úıge kirgizý quny qymbat - 150 myń teńge. Bul máseleni sheshý úshin «Jambyl Jylý» kommýnaldyq mekemesine arnaıy lıtsenzııa berip, aýlaǵa kirgizý jumystarynyń ózindik qunyn eseptep, baǵany 150 myń teńgeden 83 myń teńgege tómendettik», - dedi ákim Astanada Ortalyq kommýnıkatsııalar qyzmetinde ótken esep berý brıfınginde.
Nátıjesinde bıylǵy jeltoqsan aıyna deıin 53 myń adam gazdandyrylady.
«Qalǵan 35 myń halyqty gazben qamtamasyz etý úshin jobalyq-smetalyq qujattama ázirlenýde. Ol úshin bıýdjetten tıisti qarjy qarastyrylǵan. Al múldem gazdandyrylmaǵan 173 eldi mekenniń máselesin sheshý maqsatynda magıstraldy qubyr qurylysyna 43,5 mlrd teńgeni quraıtyn 11 joba daıyndalyp, Energetıka mınıstrligine bıýdjettik ótinim berildi», - dedi Asqar Myrzahmetov.
