Jambyl oblysy úsh jylda 100 paıyz aýyz sýmen qamtylady
Oblys ákimdiginiń energetıka jáne turǵyn úı-kommýnaldyq sharýashylyq basqarmasy baspasóz qyzmetiniń bergen málimetine qaraǵanda, halyqty ortalyqtandyrylǵan aýyz sýmen qamtamasyz etý maqsatynda «Qýatty óńirler – el damýynyń draıveri» ulttyq jobasy aıasynda ótken jyly 49 nysannyń qurylysyna 19,8 mıllıard teńge bólingen.
Onyń 13-iniń qurylysy byltyr aıaqtalyp, 22,6 myń turǵyn sapaly aýyz sýmen qamtylyp, kórsetkish 92 paıyzdy qurady.
«Oblysta sapaly aýyz sýmen qamtylǵan turǵyndar sany qalalarda 425,3 myń adam, bul 92,3 paıyzdy quraıdy. Taraz qalasynda 345,8 myń turǵyn, ıaǵnı, 94 paıyz aýyz sýmen qamtylǵan. Al Qarataý men Jańatas qalalary 100 paıyz sapaly aýyz sý tutynady. Shý qalasyna keler bolsaq, ondaǵy 25,4 myń adam nemese turǵyndardyń 67 paıyzyna aýyz sý qubyry tartylǵan.
Aýyldyq eldi mekenderdegi aýyz sýmen qamtý jaıyna toqtalsaq, sapaly aýyz sýmen qamtylǵan halyq sany – 635 myń adam, bul aýyl halqynyń 92 paıyzyn quraıdy. Aýdandar boıynsha jeke-jeke toqtalar bolsaq, Baızaq aýdanynda – 92, Jambylda – 82,8, Jýalyda – 88,8, Qordaıda – 92,3, Merkide – 96,2, Moıynqumda – 90,2, T.Rysqulovta – 95,5, Sarysýda – 97,2, Talasta – 91,5 jáne Shý aýdanynda – 92,8 paıyzdy qurap otyr.
Bıyl «Qýatty óńirler – el damýynyń draıveri» ulttyq jobasy aıasynda 36 ótpeli jáne 7 jańa, barlyǵy 43 sýmen jabdyqtaý nysanynyń qurylysyna 11 mıllıard teńge qarastyryldy. Onyń ishinde 36 jobanyń barlyǵyn jyl sońyna aıaqtaý josparlanǵan. Nátıjesinde sýmen jabdyqtaý qyzmetterine qol jetkizý kórsetkishin qalalarda 97,5 paıyzǵa, aýyldyq eldi mekenderde 96,5 paıyzǵa jetkizý josparlanyp otyr», – deıdi basqarma basshysynyń orynbasary Ermek Karentaev.
Al, bıyl Baızaq aýdanynda – Aqqııa, Sarybaraq, Botamoınaq, Qýsaq, Jeńis, Jibek joly, Tóregeldi, Tegistik-2, Aqtóbe, Jambyl aýdanynyń Besaǵash, Túrksib, Qarakemer eldi mekenderi, Jýaly aýdanynda – Báıterek, Káriqorǵan, Tasbastaý, Qordaı aýdanynda – Qarasý, Qaınar, Merki aýdanynda – Qaıyndysaı, Qumaryq, Moıynqum aýdany boıynsha Aqsúıek, Kókjelek, Sarysý aýdanynyń Úshbas, Shaǵalaly aýyldary jáne Shý aýdanynda Kókqaınar, Eńbekshi, barlyǵy 25 eldi mekenge aýyz sý qubyry tartylady.
Qazirgi ýaqytta oblystaǵy qalalardy ortalyqtandyrylǵan aýyz sýmen qamtýdy 2022 jyly – 92,4 paıyzǵa, 2023 jyly – 97,5, 2024 jyly – 98,8, al 2025 jyly – 100 paıyzǵa jetkizý kózdelgen. Sonymen qatar, aýyldyq eldi mekender 2022 jyly – 94,6 paıyz, 2023 jyly – 96,5, 2024 jyly – 98,3, 2025 jyly 100 paıyz qamtylady.
Buǵan deıin Jambyl oblysynda aýyl sharýashylyǵy tehnıkalary jańartylady dep habarlaǵan bolatynbyz.
