Jambyl oblysy turǵyndarynyń ortasha jalaqysy - 203 myń teńge

TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken kezekti apparat keńesinde bıylǵy 9 aıdaǵy áleýmettik-ekonomıkalyq damý qorytyndysy qaraldy, dep habarlaıdy QazAqparat tilshisi.

Ekonomıka jáne bıýdjettik josparlaý basqarmasynyń basshysy Gúldana Jaýynbekovanyń aıtýynsha, aǵymdaǵy jyldyń eki toqsanynda ortasha aılyq jalaqy 203,8 myń teńgeni qurap, ataýly kóriniste 25,8 paıyzǵa ósken.

Jıynǵa beınekonferentsııa rejıminde qatysqan aýdan ákimderi jyl qorytyndysymen kemshilikterdi túzetetindikterin jetkizdi.

«Kórsetkishter jaman emes. Biraq sizder áli de jumysty kúsheıte túsý kereksizder. Ekonomıkalyq kórsetkishter júz paıyzdan joǵary jáne ortasha respýblıkalyq kórsetkishten tómen bolmaýy tıis. Bizdiń mindetimiz – óńirdiń ekonomıkalyq damý qarqynyn báseńdetpeý. Eshqandaı syltaý qabyldanbaıdy. Aýdan ákimderi, basqarma basshylary kún saıyn negizgi ekonomıkalyq ındıkatorlardyń oryndalýyn taldap otyrýǵa mindetti. Jyl aıaqtalýǵa jaqyn, kemshilikterdi tez arada joıý kerek», - dedi oblys ákimi.

Óńir basshysy ekonomıkanyń ósý qarqynyn arttyrý, ınvestıtsııalar tartý jáne jumys oryndaryn qurý, azyq-túlik taýarlary baǵasynyń ósýine jol bermeý boıynsha jumystardy kúsheıtýdi tapsyrdy.

Budan soń baıandama jasaǵan qarjy basqarmasynyń basshysy Jaqsylyq Saparalıev bıýdjet kiristeri 4 paıyzǵa ulǵaıyp, 334,1 mıllıard teńgeni quraǵanyn habarlady. Ózindik kirister 70,7 mıllıard teńgeni qurap, 22,5 paıyzǵa artqan. 341,1 mıllıard teńge ıgerilse, bul jalpy qarajattyń 99,8 paıyzyn quraıdy. Bıýdjetti ıgerýde Shý jáne Jýaly aýdandary sylbyrlyq tanytyp otyr.

«Bólingen aqshany neǵurlym tıimdi ıgerip, qolda bar rezervterdi utymdy paıdalaný kerek», - dep talap etti oblys ákimi.