Jambyl oblysy turǵyndarynyń 60 paıyzy vaktsınamen qamtylmaq
Bul oraıda Jambyl oblysynda 18-64 jas aralyǵyndaǵy 659 722 turǵyn bar, onyń ishinde
qarsy kórsetkishteri men erikti túrde bas tartatyndary eskerile otyryp, (shegerim 10%), vaktsınatsııalaýǵa 593 700 adam jatady dep josparlanýda.
Aqpan aıynda bastalǵan birinshi partııamen reseılik «Spýtnık V» vaktsınasymen - 5000, naýryz-maýsym aılary aralyǵynda - 95 000, al qalǵan 493 700 adamdy otandyq vaktsınamen qamtý kózdelip otyr.
Jambyl oblystyq kópbeıindi balalar aýrýhanasynyń ınfektsııalyq blok bólimshesiniń meńgerýshisi, ınfektsıonıst dáriger Lıza Turǵanova jyl sońyna deıin halyqtyń shamamen 60 paıyzy ekpemen qamtylyp, ujymdyq ımmýnıtet qalyptasady degen senimde.
Ol ózi alǵashqylardyń biri bolyp qalalyq emhanalardyń birinde vaktsınanyń 1 komponentimen ekpe alǵan bolatyn. 21 kúnnen keıin dárigerdiń tekserýinen ótip, ekpege qarsy kórsetilimi joq ekenine kóz jetkizilgen soń, 2-shi komponenttiń dozasymen egildi. Sodan soń 30 mınýt dáriger qaraýynda bolǵan ol, ózin jaqsy sezinetindigin jáne eshqandaı keri áserdi baıqamaǵandyǵyn aıtty.
«Vaktsınatsııadan keıin densaýlyǵym zardap shekken joq, reaktsııalar baıqalmady. Nusqaýlyqqa saı vaktsınadan keıingi kútiný tártibin ustanýǵa tyrysýdamyn. Men oblystyń juqpaly aýrýlar qyzmetiniń ardageri retinde ımmýnoprofılaktıkanyń mańyzdylyǵyn
bilemin jáne túsinemin. Negizi vaktsınatsııa – juqpaly indettermen kúresýdiń tıimdi sharalarynyń biri. Immýnızatsııa arqyly atalǵan ınfektsııany joıýǵa jáne azaıtýǵa qol jetkizildi. Biz tek qana ekpe jumystaryn júrgizý arqyly COVID – 19 indetin oqshaýlaı alamyz. Oblysymyzda turatyn halyqtyń kem degende 60% -yn egý – ujymdyq, popýlıatsııalyq ımmýnıtetti qurý arqyly biz koronavırýstyń odan ári taralýyn toqtata alamyz», - degen Lıza Turǵanova ınfektsıonıst dáriger retinde óz áriptesterin, medıtsına qyzmetkerlerin, oblys turǵyndaryn ekpe alýǵa shaqyrady.
Aıta keteıik, búgingi tańǵa deıin 850 jambyldyq medıtsına qyzmetkerine erikti túrde vaktsına salyndy. Oblysta 22 aqpannan bastap koronavırýs ınfektsııasyna qarsy «Spýtnık V» vaktsınasynyń ekinshi komponentin saldyrý bastalǵan.
