Jambyl oblysy tranzıttik áleýetin arttyrady

TARAZ. QazAqparat - Jambyl oblysyndaǵy Shý-Otar temirjol bóligindegi ekinshi joldardyń qurylysyn jyl sońyna deıin aıaqtaý josparlanyp otyr, dep habarlaıdy «QazAqparat» HAA tilshisi. 

«QTJ - júk tasymaly (JT)» AQ - «JT Jambyldaǵy bólimshesi» dırektorynyń orynbasary Úmitbek Rysbekovtyń oıynsha, memlekettik «Nurly jol» baǵdarlamasy elimizdegi, sonyń ishinde Jambyl oblysyndaǵy ınfraqurylymdardy damytý baǵytynda jasalǵan taǵy bir baspaldaq.

«Qazaqstan temir joly» Ulttyq kompanııasynda» bıznesti túrlendirý baǵdarlamasy aıasynda jańa júk tasymaldaýshy paıda bolyp, óz kezeginde ol júk tasymaldaý kólemin ulǵaıtyp, dástúrli taýarlardy tasymaldaý boıynsha básekege qabilettilikti arttyrýǵa yqpal etpek.

«JT Jambyldaǵy bólimshesi» fılıaly «Qazaqstan Temir joly» UQ» AQ-ynyń bir bóligi jáne Shyǵysty Batyspen, Azııany Eýropamen baılanystyratyn magıstraldy jol toraby bolyp tabylady. Qazirgi ýaqytta Qazaqstannyń tranzıttik áleýetin jáne otandyq eksportty damytý maqsatynda iri ınfraqurylymdyq jobalar júzege asyrylýda. Solardyń biri - Prezıdent Nursultan Nazarbaevtyń «Nurly jol - Bolashaqqa bastar jol» baǵdarlamasynyń aıasynda júzege asyrylyp jatqan Shý - Otar temirjol bóligindegi ekinshi joldardyń qurylysy», - dep túsindirdi suhbat berýshi. 

Onyń aıtýynsha, ekinshi joldar paıdalanýǵa berilgennen keıin, aýmaqtaǵy júkterdi ótkizý qabilettiligin úsh esege - 25-ten 80 mln tonnaǵa deıin arttyrýǵa múmkindik týady. Júk poıyzdarynyń júrý ýaqyty eki esege qysqarady. Jobany júzege asyrý barysynda 49 kılometrden astam negizgi joldar salynyp, táýligine 68 jup poıyz ótkizýge múmkindik beredi. Qosymsha jumys oryndary da paıda bolady.