Jambyl oblysy Rysqulov aýdanynda alǵash ret raps daqyly egilýde

Jambyl oblysynyń ákimi Berdibek Saparbaevtyń tapsyrmasyna sáıkes, aımaqta raps daqylyn egý jumystary qarqyndy júrgizilip keledi. Máselen, Rysqulov aýdanynda 100 gektarǵa jýyq alqapqa kúzdik raps daqylyn egý josparlanǵan bolatyn. Túsindirý jumystarynyń júıeli júrgizilýiniń nátıjesinde aýdan sharýalary jospardy artyǵymen oryndap, 160 gektar alqapqa dán sebýdi maqsat etip otyr. Ótken aptada qojalyqtardyń birnesheýi jerge atalmysh maıly daqyldy bastyryp ta úlgerdi. Ásirese, Abaı aýyldyq okrýgindegi birneshe sharýa qojalyqtary kúzdik raps daqylyn egýge nıet tanytqan desek, solardyń biri — «Dostyq - E» sharýa qojalyǵy.

Sharýashylyq basshysy Aıtjan Ihıev aty atalǵan daqyldy óz alqabynyń 10 gektaryna egýde. Bul maqsatta Murat Aıtymbetov pen Andreı Isaev syndy mehanızatorlar egis alqabyndaǵy qıyn jumystardy eńserip, tynbaı eńbek etip júr. Qojalyq jetekshisiniń aıtýynsha, atalmysh bastamaǵa jergilikti basshylar barynsha qoldaý kórsetipti.

Okrýgtegi «Medeý tóre», «Qurmanbaı», «Nurpeıis» sharýa qojalyqtary da raps daqylyn egýge nıet tanytqan.

Agrosalany alshań bastyratyn dál osyndaı bastamalardy qoldaýǵa jańaturmystyq sharýalar da zor yqylas tanytyp otyr eken. Solardyń biri — «Ádil» sharýa qojalyǵy. Onyń basshysy Qaldybek Ádilov te ózine tıesili egistik alqaptyń 10 gektaryna raps daqylyn egipti. Sharýanyń aıtýynsha, ol daqyldy ekpes buryn ony jan-jaqty zerttep kórgen.

Egistik alqabyna arnaıy barǵan aýdan ákiminiń orynbasary Erlan Qalybaev pen aýylsharýashylyǵy bóliminiń sektor meńgerýshisi Áldıbek Týǵanbaev raps daqyly jerdi tyńaıtýǵa qolaıly daqyl ekenin, sondaı-aq, aýa raıynyń ártúrli jaǵdaılaryna tózimdi bolatynyn alǵa tartyp, qojalyqtyń bastamasyna sáttilik tiledi.

Jalpy kúzdik raps daqylyn egýge aýdannan 15 sharýa qojalyq nıet bildirgen. Ol úshin aýylsharýashylyǵy bólimi 600 kılogramm daqyldy aýdanǵa jetkizý baǵytynda júıeli jumys jasap, qojalyqtarǵa úlestiripti. Aldaǵy ýaqytta daqyldy egýge qulshynys tanytyp otyrǵan ózge de sharýalar da bar eken.