Jambyl oblysy prokýrorynyń burynǵy kómekshisi 12 mln teńge aıyppul tóleıdi
Sot aldynda eki adam jaýap berýde. Olardyń biri - oblys prokýrorynyń aǵa kómekshisi, jazanyń oryndalýyn baqylaý jónindegi basqarma basshysy. Aıyptalýshylarǵa QR Qylmystyq kodeksiniń 24-baby 3-bóligi (qylmysqa daıyndalý jáne qylmysqa oqtalý), 190-baby 3-bóliginiń 2-tarmaqshasy (asa iri kólemdegi alaıaqtyq) jáne 28-baby 5-bóligi (qylmysqa qatysý) boıynsha kiná taǵylǵan.
Іs materıaldaryna sáıkes, ÝJD 158/2 mekemesinde jazasyn ótep jatqan azamat D. qonystaný kolonııasyna aýysý úshin azamat Ý.-ǵa júgingen. Ol óz kezeginde tanysy - oblys prokýrorynyń aǵa kómekshisi azamat A.-dan kómek suraǵan.
A. qolǵabys etýge daıyn ekendigin jáne Ý. arqyly bir mıllıon teńge berýi qajettigin aıtqan.
Bıylǵy jyldyń 29 naýryzy kúni Ulttyq qaýipsizdik komıteti departamentiniń 5-inshi basqarmasynyń qyzmetkerleri azamat Ý.-dy ustap, ol tintý kezinde ózimen birge bolǵan, A.-ǵa berýi tıis 1 mln 200 myń teńgeni óz erkimen alyp shyqqan.
«Sot úkimimen A. kináli dep tanylyp, oǵan 12 mln teńge kóleminde aıyppul tóleý jazasy taǵaıyndaldy. Sondaı-aq ol memlekettik qyzmette laýazymdardy atqarý quqyǵynan ómir boıyna aıyryldy. Azamat Ý. kináli dep tanylyp, oǵan bes jylǵa bas bostandyǵynan aıyrý jazasy belgilendi. Sonymen birge ol memlekettik qyzmette laýazymdardy ıelený quqyǵynan ómir boıyna aıyryldy. Sot úkimi zańdy kúshine engen joq», - dep málim etti №2 qalalyq sottyń baspasóz qyzmetinen.