Jambyl oblysy Qyzylorda óńirine 33 tonna shóp jóneltti
TARAZ. QazAqparat – Jambyl oblysy Qyzylorda óńirine 33 tonna shóp jóneltti. Igilikti is atalǵan óńirde qýańshylyq bolýyna baılanysty aımaqtyń belsendi azamattarynyń usynysymen qolǵa alyndy, - dep habarlaıdy QazAqparat tilshisi.
Osylaısha, Shý, Lýgovoı, Jańatas jáne Taraz qalasy temir jol stansalaryndaǵy vagondarǵa oblysymyzdyń barlyq aýdandarynan kelgen jońyshqa, pishen jáne tabıǵı shóp artylyp, Syr eline jol tartty.
Bul sharaǵa Baızaq aýdanyndaǵy Yntymaq aýyldyq okrýgine qarasty «Birlik» sharýa qojalyǵy da óz úlesterin qosyp, 300 baý jońyshqa bergen.
«Syn saǵatta birligimiz synalady, birge bolsaq – yntymaǵymyz nyǵaıady. Bizdiń búgingi jasap jatqan amalymyz ýaqyt ozdyrmaı, qýańshylyqqa tap bolǵan aǵaıynǵa shópti erterek jetkizý», - deıdi baızaqtyq «Birlik» sharýa qojalyǵynyń jetekshisi Rústem Aqylbekov.
Oblystyq aýyl sharýashylyǵy basqarmasynyń basshysy Qaırat Amanovtyń aıtýynsha, aımaqta qajetti iri sabaqty mal azyǵy qory jetkilikti.
«Búgingi tańda oblysymyzda mal azyǵyn daıyndaý jumystary jalǵasyn tabýda. Mal qystaýyn qalypty ótkizý úshin 1,7 mıllıon tonna pishen daıyndaý josparlanǵan. Búginde 1,5 mıllıon tonna pishen, 58 myń tonna pishendeme daıyndaldy. Alda súrlem daıyndaý naýqany tur. Jalpy oblysta mal azyǵyna qajetti iri sabaqty mal azyǵynyń qory qajet mólsherde jınaldy. Endi, mine, óńir sharýalarynyń usynysymen qýańshylyqtan zardap shekken Qyzylorda oblysynyń Aral qalasyna, Sekseýil kenti men Qamystybas aýyldyq okrýgindegi sharýalarǵa jem-shóp jetkiziletin bolady», - deıdi ol.
Jambyl oblysynyń jurtshylyǵy qyzylordalyq aǵaıyndarǵa ári qaraı da kómek kórsetetindigin jetkizdi.
