Jambyl oblysy:kólik júrgizý quqynan aıyrylǵandar mas kúıinde qaıta rýlge otyrǵan

TARAZ. QazAqparat - Jol-kólik oqıǵasynyń sanyn azaıtý, sondaı-aq Jambyl oblysynyń aýmaǵynda jol qozǵalysy ereje buzýshylyqtaryn aldyn alý maqsatynda mereke-demalys kúnderi ishimdik ishken júrgizýshilerdi anyqtaý boıynsha jumys júrgizildi, dep habarlaıdy QazAqparat.

Aımaqtaǵy polıtsııa departamentiniń málimetinshe, bekitilgen jol ýchaskelerin patrýldeý kezinde mas kúıinde kólik júrgizgen 6 júrgizýshi anyqtalǵan. Munyń 2-eýi mas kúıinde kólikke qaıta otyrǵan.

«24 qazanda saǵat 12:00 shamasynda Qarataý qalasyndaǵy shaǵyn aýdanda patrýldik polıtsııa 36 jastaǵy jergilikti turǵynnyń «Toıota-Kamrı 25» avtomashınasyn toqtatty. Qujattardy tekserý barysynda júrgizýshiniń ishimdik ishkeni anyqtaldy. Er adamnyń mas kúıinde kólik júrgizgenin medıtsınalyq tekserý de kórsetti. Tekserý kezinde júrgizýshiniń 2021 jyldyń jeltoqsanynda sot sheshimimen kólik quralyn júrgizý quqyǵynan 7 jylǵa aıyrylǵany anyqtaldy», - dep jazdy vedomstvodan.

Osyǵan uqsas qylmys 25 qazanda Jýaly aýdanynda da tirkeldi. «Mersedes» kóliginiń 39 jastaǵy júrgizýshisi medıtsınalyq qorytyndyǵa sáıkes jeńil mas kúıinde kólik júrgizgen.

Atalǵan derekter boıynsha polıtsııa qyzmetkerleri Qylmystyq kodekstiń 346-baby 2-bóligi boıynsha sotqa deıingi tergep-tekserýdi bastady. Avtokólikter aıyp turaǵyna qoıyldy.

Bul qylmysty jasaǵany úshin belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, tórt jyldan alty jylǵa deıingi merzimge bas bostandyǵynan aıyrý túrindegi jaýapkershilik kózdelgen.

Jambyl oblysynyń Polıtsııa departamenti azamattardy jol qozǵalysy erejelerin múltiksiz saqtaýǵa, ishimdik iship kólik júrgizbeýge, jyldamdyqty asyrmaýǵa jáne qarsy jolaqqa shyqpaýǵa shaqyrady.