Jambyl oblysy: Qant qyzylshasynyń sapasy ǵaryshtan baqylanady
ASTANA. QazAqparat - Bıyl Jambyl oblysynda qant qyzylshasy alqabynyń kólemi artty, dep habarlaıdy QazAqparat Jambyl oblystyq aýyl sharýashylyǵy basqarmasynyń baspasóz qyzmetine silteme jasap.
Jambyl oblysynda qant qyzylshasy alqabynyń artýy memleket tarapynan kórsetilip otyrǵan qoldaýǵa baılanysty. Máselen, byltyr 9500 gektar jerge baltamyr ekken dala eńbekkerleri bıyl onyń kólemin taǵy da 1000 gektarǵa arttyryp otyr.
Qant qyzylshasy alqabynyń ulǵaıýy bıyl ony satyp alý baǵasynyń bir teńgege artýy men memleketten ár kelige beriletin 10 teńge sýbsıdııanyń 12 teńgege kóterilýine baılanysty. Ótken jyly 2000 gektar jerge qant qyzylshasyn egip, odan mol ónim alǵan Merkilik sharýalar osy úrdisti bıyl da jalǵastyrmaqshy. Máselen: byltyr 200 gektar jerge baltamyr otyrǵyzyp, odan 800 tsentnerge deıin ónim alǵan «Sypataı Batyr» seriktestigi bıyl qyzylsha alqabyn 300 gektarǵa arttyrdy.
Qazirgi tańda bul sharýashylyqta jańbyrlatyp sýarý ádisi qoldanylady. Sonymen qatar, qyzylshanyń salmaǵy búgingi kúni 400-500 gramǵa deıin jetip qaldy. Bul ýaqtyly sýǵaryp, mıneraldy tyńaıtqyshtardy tıimdi qoldanýdyń arqasy deıdi agro sala mamandary. Jalpy, Merki aýdany boıynsha bıyl 20 dan astam sharýashylyq qant qyzylshasymen naqty aınalysyp otyr.
Taǵy bir aıta ketetin mańyzdy másele, bıyl oblysta alǵash ret kosmomonıtorıng jobasy júzese asyp otyr. Bul ǵaryshtyq túsirilim arqyly egistik kólemi men sapasyn baqylap otyrýǵa múmkindik beredi. Onyń ishinde qant qyzylshasy alqabynyń da tapsyrylǵan kólemi anyqtalmaqshy.
