Jambyl oblysy qant qyzylshasyn ósirýdi eseleı túsýde
ASTANA. QazAqparat - Aǵymdaǵy jyly Jambyl oblysynda 9 myń gektar alqapqa qant qyzylshasy egildi. Bul týraly búgin Ortalyq kommýnıkatsııalar qyzmetindegi brıfıngte atalǵan óńirdiń Aýyl sharýashylyǵy basqarmasynyń basshysy Nurjan Nurjigitov málim etti, dep habarlaıdy QazAqparat.
«Óńirde egistik alqaptaryn ártaraptandyrýǵa baǵyttalǵan úlken jumystar júrgizilý ústinde. Onyń ishinde qant qyzylshasyna da aıryqsha nazar aýdaryp otyrmyz. Máselen, ótken jyly qant qyzylshasy 5,6 alqapqa egilse, bıyl onyń kólemi 9 myń gektardy qurap otyr», - dedi ol.
Onyń sózine qaraǵanda, sońǵy 2 jyldyń ishinde ónim kólemin arttyrý úshin 1 mlrd teńgege jýyq qarjy bólingen. Aǵymdaǵy jyly qant zaýyttaryna 155 myń tonna tátti túbir ótkizý josparda bar.
Sonymen qatar ol oblysta 2015 jyly alǵash ret otyrǵyzylǵan údemeli alma baqtardyń aýmaǵy ótken jyly 112 gektarǵa ulǵaıyp, 235 gektarǵa jetse, bıylǵy jyly qosymsha 90 gektarǵa alma baǵy otyrǵyzylyp, jalpy kólemi 325 gektardy quraǵandyǵyn aıtty.
«2020 jylǵa deıin óńirlerdi damytý baǵdarlamasy aıasynda údemeli alma baqtarynyń aýmaǵyn 1600 gektarǵa jetkizýdi josparlap otyrmyz», - dedi Nurjigitov.
Basqarma basshysynyń aıtýynsha, Jambyl oblysynda sýdy únemdeý tehnologııasyn engizý jumystary da qarqyndy júrgizilýde. Máselen, ótken jyly sý únemdeý tehnologııasy 11 973 gektarǵa engizilse, aǵymdaǵy jyly onyń kólemi 15 015 gektarǵa jetkizildi.
