Jambyl oblysy emdeý mekemelerine jańa jedel járdem kólikteri tapsyryldy
TARAZ. QazAqparat – Jambyl oblysynyń medıtsınalyq mekemeleri jańa jedel járdem kólikterin paıdalanýǵa aldy. Buǵan deıin oblysqa ókpeni jasandy jeldetý apparattary (ÓJJ), pýlsoksımetrler jáne ottegi kontsentratorlary bar gýmanıtarlyq júk kelgen bolatyn, dep habarlaıdy QazAqparat tilshisi.
Bul jolǵy kómek «Samuryq-Qazyna» AQ men QR Densaýlyq saqtaý mınıstrligi arasyndaǵy Yntymaqtastyq týraly memorandým aıasynda kórsetilip otyr. «Samuryq-Qazyna» AQ kompanııalar toby qaıyrymdylyǵynyń biryńǵaı operatory – «Samruk-Kazyna Trust»
Áleýmettik jobalardy damytý qory qajetti jabdyqtardy satyp alyp, olardy óńirlerge jiberýde.
Osy oraıda Jambyl oblysyna 3 ÓJJ, 5 ottegi kontsentratory, 50 pýlsoksımetr jetkizildi.
Sondaı-aq, oblysqa Shevrolet Damas markaly 8 jedel járdem kóligi berildi.
«Jambyl oblysy ákimdiginiń Densaýlyq saqtaý basqarmasy medıtsınalyq preparattar men dári-dármekterdi, ottegi kontsentrattaryn, ÓJJ apparattaryn jáne koronavırýs indetimen kúresýge arnalǵan basqa da qurylǵylardy satyp alýǵa kómekteskeni úshin janashyr jandarǵa alǵys bildirdi. Bul kómek ásirese indet kezinde qajet. «Samuryq-Qazyna» AQ-nan alynǵan barlyq jabdyqtar qalalyq jáne aýdandyq emhanalar arasynda bólingen», - deıdi Jambyl oblystyq densaýlyq saqtaý basqarmasynyń basshysy Áset Qalıev.
Aıta keteıik, mundaı jıyntyqtar árbir oblys, sondaı-aq respýblıkalyq mańyzy bar qalalarǵa jetkiziletin bolady.
«Bul sharalardyń barlyǵy bizdiń medıtsınamyzdyń juqpaly aýrýlarmen, sonyń ishinde COVID-19 koronavırýstyq ınfektsııamen kúresýge daıyndyq deńgeıin arttyrýǵa jáne ulttyq densaýlyq saqtaý júıesin nyǵaıtýǵa baǵyttalǵan», - deıdi «Samruk-Kazyna Trust» qorynyń resmı ókili Mıras Іrgebaev.
