Jambyl oblysy elordadaǵy jármeńkege 300 tonnaǵa jýyq ónim ákeldi
TARAZ. QazAqparat – Nur-Sultan qalasyndaǵy Han Shatyr saýda -oıyn-saýyq ortalyǵy janyndaǵy alańda jambyldyq aýyl sharýashylyq taýar óndirýshileriniń jármeńkesi ótti, dep habarlaıdy QazAqparat tilshisi.
Sharýalar elordaǵa jalpy quny 320 mıllıon teńge bolatyn 282,6 tonna azyq-túlik ónimderin ákeldi. Bul týraly Jambyl oblysy ákiminiń baspasóz qyzmeti habarlady.
Elorda turǵyndaryna et, sút jáne kondıterlik ónimder, bal, kókónister men jemister usynyldy. Jármeńkege Nur-Sultan qalasy men Jambyl oblysynyń ákimderi Altaı Kólginov pen Berdibek
Saparbaev arnaıy qatysty.
«Mundaı jármeńkeler óńiraralyq yntymaqtastyqty nyǵaıtýǵa jáne mańyzdy taýarlardyń baǵasyn turaqtandyrýǵa oń áserin tıgizedi. Bul elordalyqtardyń basym bóliginiń nazaryn aýdartqany qýantady.
Memleket sharýalarǵa jan-jaqty qoldaý kórsetýde. Bizdiń basty maqsatymyz – ımportty azaıtý jáne óz oblysymyzdy ǵana emes, kórshi óńirlerdi de otandyq ónimmen qamtamasyz etý», - dep atap ótti Berdibek Saparbaev.
Jármeńkede Jambyl oblysynyń 10 aýdany jáne Taraz qalasynan kelgen barlyǵy 90 aýyl sharýashylyǵy taýar óndirýshisi óz ónimderin usyndy.
Oblys ákiminiń orynbasary Berik Nyǵmashev jyl saıyn mundaı jármeńkeni ótkizý barysynda kólik shyǵyndary men saýda oryndarymen qamtamasyz etýdi salalyq basqarma óz moınyna alatyndyǵyn atap ótti. Taýarlardy jetkizý úshin 10 aýyr júk kóligi bólingen desek, onyń ishinde 4 tońazytqyshpen qamtylǵan kólik bar. Al, taýar óndirýshiler úshin eki avtobýs uıymdastyrylypty.
Sharýalar baǵany naryqtan 10-20 paıyz tómen baǵada ótkerýge esh qarsylyq bildirmeı, kelisim bergen.
Tutynýshylardy ónimderdiń tek baǵasy ǵana emes, sapasy da qyzyqtyrdy.
«Barlyq ónimder sanıtarlyq-veterınarlyq talaptarǵa sáıkes keledi jáne taýardyń sapasy men shyǵýyna qatysty sertıfıkattarǵa ıe.
Mundaı jármeńkeler satyp alýshylarǵa ǵana emes, satýshylarǵa da paıdaly. Sebebi, olar óz ónimderin deldalsyz tikeleı ótkerýge múmkindik alady», - deıdi Berik Nyǵmashev.
Tańerteńnen «Han Shatyr» saýda oıyn-saýyq ortalyǵy mańyndaǵy alańǵa aǵylǵan astanalyqtarda esep bolmady. Olardy tıimdi baǵadaǵy ónimderdiń sapasy men alýan túrliligi qyzyqtyrdy.
«Jambyldyq kókónister men jemister dámi erekshe. Men alma, qarbyz, qaýyn jáne keptirilgen jemisterdi bazardaǵy baǵadan eki ese arzanǵa satyp aldym», - deıdi elorda turǵyny Tolqyn Qapanova.
Taǵy bir turǵyn Altynaı Musylmanqul jármeńkeden satyp alǵan azyq-túliginiń úsh aptaǵa jetetinin tilge tıek etti.
«Kelýshiler et, sút ónimderin, kókónister men jemisterdi, jumyrtqalardy talasa satyp aldy. Sapaly jáne jańa ónimderdi satyp alýǵa, aqshamyzdy únemdeýge múmkindik boldy», - deıdi ol.
T.Rysqulovanyń aýdanynan kelgen «Halyq» QK basshysy Rysjan Halyqova jármeńkege 500 kelige jýyq et ákelipti.
«Qoı etiniń bir kelisi 1900, sıyr eti - 1800, jylqy eti - 1900 teńgeni quraıdy. Birinshi kúni-aq, úsh saǵattyń ishinde men barlyq taýarlardy satyp úlgerdim. Bizdiń etimizdiń dámin tatyp, astanalyqtar jambyldyq ónimderge rızashylyqtaryn bildiretinine kúmándanbaımyn», - deıdi fermer.
«Vasılenko» JK ónimderi de sórede kóp turmaı ótip ketken. Satýshylar baldyń 5 túrin satqan.
«Biz Jýaly aýdanynan bir tonna bal alyp keldik. Olardyń kelisi 1500 teńgeden satyldy. Baldyń densaýlyqqa paıdaly ekendigi belgili. Biz ár satyp alýshyǵa túrli aýrýlarǵa qandaı baldy paıdalaný kerektigin egjeı-tegjeıli túsindirdik», - deıdi Dmıtrıı Vasılenko.
Aýyl turǵyndarynyń tabysyn arttyrý boıynsha pılottyq jobanyń qatysýshylary da bul sharadan shet qalmady. Máselen, osy joba aıasynda qurylǵan T.Rysqulov aýdany, Qumaryq aýylynan 4 sharýa qojalyq ókilderi jármeńkege kelgen.
«Osy jármeńke úshin aýyl turǵyndarynan 8 tonna ónim jınaldy.
Bizdiń pııaz, qyzanaq, kartop, qııar, alma men qara órigimizdi satyp alýshylar az bolmady.
Qumaryq aýylynan barlyǵy 598 aýla pılottyq jobaǵa qatysýda.
Kelesi jyly biz jármeńkege úlken qurammen keletin bolamyz», - dedi Qumaryq aýylynyń ákimi Bolat Mansur.
Jármeńkeniń eki kúninde jambyldyq agrarshylar 42,8 tonna et, 5 tonna shujyq ónimderi, 12,5 tonna sút ónimderi, 5000 dana jumyrtqa, bir tonna kondıterlik jáne 1,5 tonna makaron ónimderi, 5 tonna qant, 6 tonna balyq, 2,5 tonna bal, 1,5 tonna keptirilgen jemis, 203,9 tonna kókónis pen jemis-jıdek satýǵa nıetti.
Aıta keteıik, shara barysynda az qamtylǵan otbasylarǵa 30 azyq-túlik jıyntyǵy taratyldy.
Sonymen qatar, elorda turǵyndary úshin jambyldyq qolóner sheberleri jasaǵan neo-folklor stılindegi kádesyı buıymdary men kıimder kórmesi uıymdastyryldy.
