Jambyl oblysy ekonomıkanyń barlyq salasynda jaqsy nátıjege qol jetkizdi
JAMBYL OBLYSY. QazAqparat - Aǵymdaǵy jyldyń 11 aıynda Jambyl oblysy ekonomıkasynyń barlyq salalarynda oń nátıjelerge qol jetkizilgen. Bul týraly búgin oblys ákimi Asqar Myrzahmetovtyń tóraǵalyǵymen ótken apparat májilisinde aıtyldy, dep habarlaıdy QazAqparat óńir basshysynyń resmı saıtyna silteme jasap.
Jıynnyń kún tártibindegi negizgi másele boıynsha oblystyq ekonomıka jáne bıýdjetti josparlaý basqarmasynyń basshysy Gúldana Jaýynbekova baıandama jasady.
Ol ústimizdegi jyldyń qańtar-jeltoqsan aılarynda oblys ekonomıkasynyń barlyq salalarynda oń kórsetkishter saqtalyp otyrǵanyn jetkizdi. Atap aıtqanda ónerkásip, aýyl sharýashylyǵy, qurylys, saýda, kólik, baılanys sekildi alty negizgi salanyń damý dınamıkasyn qamtıtyn qysqa merzimdi ekonomıkalyq ındıkator on bir aıdyń qorytyndysymen 105,2 paıyzdy quraǵan. Jyl qorytyndysymen de ekonomıkalyq kórsetkish osy deńgeıde saqtalady dep kútilýde. Al, jalpy óńirlik ónimniń ósim dınamıkasy jospardaǵy 104,2 paıyz deńgeıinde qalyptasady dep josparlanýda. Aǵymdaǵy jyldyń on bir aıynyń qorytyndysy boıynsha ónerkásip 6,3 paıyzǵa ósse, onyń 74 paıyzy óńdeý salasyna tıesili.
Asqar Isabekuly on bir aılyq kórsetkish boıynsha oblystyń ekonomıkalyq damýy Úkimette oń baǵalanǵanyn aıtyp, jyl sońyna deıin osy joǵary dınamıkany saqtap turýǵa barynsha kúsh salý kerektigin eskertti.
Jıyn barysynda oblys ákimdiginiń qarjy basqarmasynyń basshysy Roza Isaeva, energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarov, jumyspen qamtýdy úılestirý jáne áleýmettik baǵdarlamalar basqarmasynyń basshysy Tımýrjan Nurymbetov, aýylsharýashylyq basqarmasynyń basshysy Berik Nyǵmashov baıandama jasap, óz baǵyttary boıynsha kútilip otyrǵan kórsetkishterge toqtaldy.
Sondaı-aq, basqosýda salalardaǵy jetistiktermen qatar, jyldyq jospardyń oryndalmaýy múmkin kórsetkishter de aıtyldy. Ol boıynsha selektrlik rejimde qatysyp otyrǵan aýdan ákimderinen saýaldar joldanyp, jaýaptar alyndy.
Aımaq basshysy Asqar Myrzahmetov jylytý maýsymynyń oıdaǵydaı ótý barysyna, satyp alynǵan kómirlerdiń sapasyna, azyq-túlik baǵalaryn qatań baqylaýda bolýyna, ataýly áleýmettik kómektiń jańa talaptary boıynsha túsindirý sharalarynyń júıeli júrgizilýine aıryqsha kóńil bólip, tıisti tulǵalarǵa naqty tapsyrmalar júktedi.
