Jambyl oblysy: Bızneske kedergi keltirgen 7 sheneýnik jazalandy
ASTANA. QazAqparat - «Atameken» QR Ulttyq kásipkerler palatasy tóralqa tóraǵasy Tımýr Qulybaev Kásipkerler palatasy óńirlik keńesiniń otyrysyna qatysty. Bul týraly QazAqparat palatanyń saıtyna silteme jasap habarlaıdy.
Іs-sharaǵa Jambyl oblysynyń ákimi Asqar Myrzahmetov, memlekettik organdar men óńir bıznesiniń ókilderi qatysty.
Ulttyq kásipkerler palatasynyń bıznesti qorǵaý baǵytyndaǵy jumysynyń nátıjesi týraly aıtqan Tımýr Qulybaev «Atameken» Ulttyq kásipkerler palatasy Bas prokýratýra, Memlekettik qyzmet isteri jáne sybaılas jemqorlyqqa qarsy is-qımyl agenttigi, sondaı-aq Joǵarǵy sotpen baılanys ornatqanyn atap ótti.
«Kásipkerlerdiń isi sotta qaralǵanda kóp jaǵdaıda is memlekettik organdardyń paıdasyna sheshiledi. Byltyr bul tájirıbeni birlesip zertteý jáne joıý úshin Joǵarǵy sotpen Jol kartasyna qol qoıdyq. Jalpy aıtatyn bolsaq, «Atameken» jumys istegeli beri Ulttyq palataǵa 22 myńnan asa ótinim kelip tústi, onyń 40% jýyǵyn oń sheshildi. Osylaısha, 92 mlrd teńgeden astam somada kásipkerlerdiń múliktik quqyǵy qorǵaldy», - dep habarlady Tımýr Qulybaev.
Bıznesti qorǵaýǵa óńirlik deńgeıde de basymdyq berilgen.
Óńirlik kásipkerler palatasynyń dırektory Máripbek Shákerbek bıznesmenderdiń palataǵa túsirgen shaǵymynan keıin jyl basynan beri alty sheneýnik - tártiptik jaýapkershilikke, bir sheneýnik - ákimshilik jaýapkershilikke tartylǵanyn habarlady. Byltyr Jambyl oblysy kásipkerler palatasyna 162 ótinim túsken, onyń ishinde 59 ótinim oń sheshildi. Kásipkerlerdiń 2,5 mlrd teńgege múliktik quqyǵy qorǵalǵan.
Sonymen qatar shaǵyn jáne orta kásipkerliktiń óńir ekonomıkasyna salǵan aıtarlyqtaı úlesi de atap ótildi. Byltyr bıznesten jalpy somasy 28,5 mlrd teńge salyq túken, ıaǵnı oblys bıýdjetiniń 35% quraǵan.
Kásipkerler palatasy ákimdikpen birlesip, saýda oryndarynyń syrtqy sıpatyna biryńǵaı standart pen talap qoıa otyryp, bızneske saýdasy úshin bos oryndardy berý baǵdarlamasyn daıyndaýda. Sonymen qatar óńirde kommýnıkatsııasy júrgizilgen oryndardy jalǵa beretin shaǵyn ındýstrııalyq aımaq qurý máselesi de talqylaný ústinde.
Jambyl oblysynda Ulttyq palatasynyń bastamasymen qolǵa alynǵan «Bastaý» bıznesi sátti júzege asyrylyp otyr. 2017 jyly óńirde 1125 azamat kásipkerlik negizderi boıynsha bilim aldy. Bıyl bul kórsetkishti eki esege ulǵaıtý kózdelgen. Sonymen qatar Jambyl oblysynyń eń az degende 500 azamaty jeke kásibin ashady dep kútilýde.
