Jambyl oblysy aýyl sharýashylyǵy basqarmasy basshysynyń orynbasary 6 jylǵa sottaldy

ASTANA. QazAqparat – Taraz qalasynyń №2 soty alaıaqtyq, iri mólsherde bógdeniń múlkin jymqyrý jáne ıemdený boıynsha aıyptalǵan 4 tulǵaǵa qatysty úkim shyǵardy, dep habarlaıdy QazAqparat tilshisi atalǵan sottyń baspasóz qyzmetine silteme jasap.

«Jambyl oblysy ákimdiginiń aýyl sharýashylyǵy basqarmasy memlekettik mekemesi basshysynyń ósimdik sharýashylyǵy máseleleri jónindegi orynbasary K. jáne kásipkerler E., D. jáne M. sýbsıdııa qaǵıdalaryn buza otyryp, «Albıon» qulpynaı kóshetterine memlekettik sýbsıdııa alǵan. Olardyń bir bóligi alaıaqtyq jolmen urlanyp, jeke qajettilikterine jumsalǵan. Memleketke 550 849 430 teńge kóleminde zalal keltirildi», - delingen resmı habarlamada.

Sot aqparatynda aıtylǵandaı, aıyptylardyń kinási dáleldemelermen, kýálerler aıǵaǵy, beınejazbalar, sarapshylardyń qorytyndylary jáne zattaı dáleldermen rastaldy.

Prokýror isti qaraı kele, D. men M.-ny (kásipkerler) 5 jylǵa bas bostandyǵynan aıyrý jazasyn, shartty túrde taǵaıyndaýdy, sonymen qatar K.-ny (aýyl sharýashylyǵy basqarmasy basshysynyń orynbasary) 6 jylǵa bas bostandyǵynan aıyrýdy jáne E.-niń (kásipker) múlkin tárkilep, 5 jylǵa bas bostandyǵynan aıyrý jazasyn surady.

Óz kezeginde sottalýshylar kinálerin moıyndamaı, aqtaýdy ótindi.

«Jaza taǵaıyndaý kezinde sot qylmystyq jaýaptylyq pen jazany aýyrlatatyn mán-jaıǵa K.-nyń kásibı antty buzǵany, al jeńildetetin jaǵdaılarǵa buryn sottalmaýy men K., D. jáne M.-nyń jas balalarynyń bolýyn eskerdi. Sot úkimimen K. kináli dep tanylyp, oǵan 6 jylǵa bas bostandyǵynan aıyrý jazasy taǵaıyndalyp, ómir boıyna memlekettik qyzmette laýazym atqarý quqyǵynan aıyryldy», - delingen úkimde.

Sondaı-aq, sot úkiminde E.-niń de múlki tárkilenip, kez kelgen menshik nysanyndaǵy uıymdarda basshylyq laýazymdy atqarý quqyǵynan aıyra otyryp, 5 jylǵa bas bostandyǵynan aıyrý jazasy taǵaıyndaldy.

«D. men M.-ǵa múlki tárkilenip, kez kelgen menshik nysanyndaǵy uıymdarda basshylyq laýazymdy atqarý quqyǵynan aıyra otyryp, árqaısysyna 5 jylǵa bas bostandyǵynan aıyrý jazasy belgilendi. Qylmystyq kodekstiń 63-babyna sáıkes probatsııalyq baqylaý belgilene otyryp shartty túrde taǵaıyndaldy», - dep habarlaıdy Taraz qalasynyń №2 sotynan.

Úkim zańdy kúshine engen joq.