Jambyl oblysy aktıvinde Prezıdent atap kórsetken jańa baǵyttar saralandy
Joldaýdy talqylaýǵa saıası partııalardyń, bıznes-qaýymdastyqtar men zııaly qaýym, kásipodaq uıymdary men ekinshi deńgeıli bankterdiń ókilderi qatysty.
Jıynǵa qatysýshylar shaǵyn jáne orta bıznesti qoldaý, kommýnaldyq menshik nysandaryn jekeshelendirý, ekologııa, "jasyl" ekonomıka, quqyqtyq tártipti qamtamasyz etý, máslıhattardyń, Qoǵamdyq keńestiń jumysy,
kóppartııalyq júıeni odan ári damytý, halyqtyń óz zeınetaqy jınaqtarynyń bir bóligin paıdalanýy, jeke turǵyn úı qurylysyn damytý, "5-10-25", "Nurly jer"
baǵdarlamalaryn iske asyrý, balalardyń qaýipsizdigi men quqyqtaryn qorǵaý máselelerin talqylady.
Oblystyń Qoǵamdyq keńesiniń tóraǵasy Ámzebek Jolshybekov, M.H.Dýlatı atyndaǵy Taraz óńirlik ýnıversıtetiniń rektory Mahmetǵalı Sarybekov, kásipkerler palatasy óńirlik keńesiniń tóraǵasy Muqash Eskendirov, «Aýyl» HDPP fılıalynyń tóraǵasy Erbolat Saýryqov, "Jastar-zertteý" qoǵamdyq birlestiginiń jetekshisi Parıda Mamedova Joldaýda júktelgen mindetterdi júzege asyrý joldary týraly oılaryn ortaǵa saldy.
«Prezıdent koronavırýspen kúres sharalaryna aıryqsha nazar aýdardy.
Bosańsýǵa áli erte. Koronavırýstyq ınfektsııanyń taralýyna qarsy turý máseleleri erekshe baqylaýda bolýy kerek. Oblysymyzda tósek-oryn sanyn kóbeıtý jumystary júrgizilýde, dári-dármekter men medıtsınalyq jabdyqtar qory qalyptasýda. Jaqynda ǵana ashylǵan ortalyqta koronavırýspen aýyrǵan turǵyndar ońaltý kýrsynan ótip jatyr. Biz jambyldyqtardyń sapaly medıtsınalyq qyzmet alýy úshin barymyzdy salyp jatyrmyz», - dedi oblys ákimi Berdibek Saparbaev.
Berdibek Saparbaev Memleket basshysynyń el damýynyń eń ózekti problemalaryn atap ótip, olardy sheshý joldaryn kórsetip, strategııalyq basymdyqtardy aıqyndaǵanyn basa aıtty.
«Joldaýdy negizge ala otyryp, biz oblystyń áleýmettik-ekonomıkalyq damýynyń negizgi baǵyttaryn aıqyndaımyz.
Negizgi basymdyq - jumyspen qamtýdy qamtamasyz etý jáne azamattarymyzdyń
ál-aýqatyn arttyrý», - dedi oblys ákimi.
Birinshiden, memlekettik basqarý, kadr saıasaty, sheshimder qabyldaý júıesi jáne olardy oryndaýdaǵy jaýapkershilik tásilderi ózgeredi.
Aımaq basshysy óz sózinde jańa jaǵdaıdaǵy ekonomıkalyq damý, ımportty azaıtý jáne Jambyl kásiporyndarynyń eksporttyq áleýetin damytý mańyzdylyǵyna aıryqsha toqtaldy.
«Elimizdiń jańa ekonomıkalyq baǵyty el Prezıdenti atap kórsetken jeti negizgi qaǵıdatqa negizdelýi kerek. Bizdiń óndiristik áleýetimizdi tolyǵymen paıdalaný tapsyryldy. Óńdeý ónerkásibindegi tústi metallýrgııa, mashına jasaý, aýylsharýashylyq ónimderin qaıta óńdeý, qurylys materıaldary men tamaq óndirisi sekildi jańa baǵyttardy zerdeleý qajet. Bizdiń oblysta bul baǵyttardaǵy jobalardy zerdeleýge jáne júzege asyrýǵa barlyq jaǵdaılar jasalǵan. Tıisti tapsyrma meniń orynbasarlaryma jáne salalyq basqarma basshylaryna júkteledi», - dedi oblys ákimi.
Óńir basshysy qazirgi tańdaǵy tsıfrlandyrýǵa qatysty máselelerdi joıý, barlyq azamattardyń ınternetke qoljetimdiligin qamtamasyz etý boıynsha aýqymdy jumystardyń kútip turǵandyǵyna toqtaldy. Búginde qashyqtan oqytýǵa baılanysty tsıfrlandyrý máseleleri de ózekti bolyp otyr.
«Memleket basshysynyń tapsyrmasy boıynsha bizdiń oblysta áleýmettik osal otbasylardyń balalaryn kompıýterlik jabdyqtarmen jáne joǵary sapaly ınternetpen qamtamasyz etý boıynsha tıisti sharalar qabyldandy», - dedi Berdibek Saparbaev.