Jambyl oblysy ákimdiginde kóktemgi sý tasqynynyń aldyn alý sharalary talqylandy
TARAZ. QazAqparat – Jambyl oblysy ákimdiginde ótken jıynda tótenshe jaǵdaılar departamentiniń basshysy Baǵdat Danılov óńirdiń kóktemgi sý tasqynynyń aldyn-alý sharalaryna daıyndyq barysy týraly baıandady, - dep habarlaıdy QazAqparat oblys ákiminiń baspasóz qyzmetine silteme jasap.
Oblys turǵyndary úshin sý tasqyny Shý, Talas jáne Asa ózenderinen, sondaı-aq 14 sý qoımasynda bolýy múmkin. Sý basýdy boldyrmaý maqsatynda keshendi is-sharalar júrgizilen.
Departament basshysynyń aıtýynsha, 142 shaqyrymdyq káriz qubyrlary jáne sý arnalary, 185 shaqyrym aryq jelisi, 430 temirjol jáne avtomobıl joldaryndaǵy kópir, sondaı-aq 1790 sý ótkizý toraby tazartylǵan. «Kóktem» komandalyq shtabtyq oqý-jattyǵýy barysynda azamattyq qorǵanys kúshteri men quraldary tolyq daıyndyqqa keltirildi.
Oblys ákimi Berdibek Saparbaev TJ qyzmetin jergilikti atqarýshy organdarmen birlese otyryp aldyn alý sharalaryn jalǵastyrýǵa shaqyrdy.
«Aýa raıy kútpegen jerden ózgerýi múmkin. Sondyqtan biz bárine daıyn bolýymyz kerek», - dedi ol.
