Jambyl oblysy ákimdiginde «Ashyq ákimdik» front-ofısi iske qosyldy

TARAZ. QazAqparat – «Jambyl–adaldyq alańy» jobalyq keńsesinde oblys ákiminiń birinshi orynbasary, «Jambyl–adaldyq alańy» jobasynyń kýratory Bekbolat Orynbekovtyń onlaın rejımde azamattardy qabyldaýy ótti, dep habarlaıdy QazAqparat.

​Qabyldaýda joba kýratory turmystyq jemqorlyqty joıý jáne azamattarǵa qolaıly jaǵdaı jasaý, qoǵamdyq baqylaýdy iske asyrý, sybaılas jemqorlyqqa qarsy mádenıetti qalyptastyrý maqsatynda qurylǵan jobanyń osy ýaqytqa deıin atqarǵan jumystaryna toqtaldy.

​«Oblys kóleminde jastardyń kez kelgen sybaılas jemqorlyq kórinisterine múldem tózbeýshiligin qalyptastyrýǵa yqpal etetin jáne balalardy adaldyqqa, parasattylyqqa úıretetin 380 adaldyq dúkeni jumys isteýde. Oblystyq densaýlyq saqtaý basqarmasymen birlese otyryp joba aıasynda josparlar qurylǵanyn, bilim basqarmasymen birge jumystar atqarylyp, mekteptegi aqsha jınaý, remont taǵy basqa máselerge baqylaý qoıyldy. «Jambyl - adaldyq alańy» jobalyq keńsesi halyqpen tyǵyz qarym qatynasta jumys isteıdi, osy joba keńsesinde barlyq basqarma basshylary oblys halqymen onlaın túrde qoǵamdyq qabyldaýlar uıymdastyrýda»,- dedi B.Orynbekov óz sózinde.

​Spıker qazirgi tańda jobanyń atqarǵan qomaqty jumysynyń biri retinde – óńirdegi barlyq deńgeıdegi basshylardyń ashyqtyǵy qamtamasyz etilip, oblys jáne Taraz qalasynyń ákimdiginiń birinshi qabatynan «Ashyq ákimdik» front ofısi iske qosylyp, qoǵamdyq qabyldaýlar óte bastaǵanyn aıtyp ótti. Sonymen birge, joba qyzmetkerleri júrgizgen monıtorıng nátıjesinde birqatar basshylar sharshy metri az birinshi qabattarǵa kóshkenin, onyń ishinde kóbi mektep dırektorlary ekenine toqtaldy.

​«Joba aıasynda «Halyqtyq zańger» aktsııasy uıymdastyrylyp, aktsııa barysynda Jambyl aýdanyndaǵy kóshedegi jaryq pen gaz máselesi sheshildi. Sondaı-aq Baızaq aýdanyndaǵy «Osha» alqabynyń turǵyndary jaryqty durys bermeıtinderin aıtyp shaǵymdanyp keldi. Jaryq qýatynyń tómendiginen turmystyq tehnıkalar kúıip, aýyl halqy shyǵynǵa batqan. Aktsııa aıasynda Kóktal aýyldyq okrýgi jáne aýdandyq ákimdik bıýdjetinen 1 mıllıon 200 myń teńge qaralyp, transformator ornatylatyn boldy»,-dedi joba kýratory.

​Aıta keteıik, qabyldaý barysynda Taraz qalasyna Qumshaǵal aýylynyń turǵyny Orynbasar Toqbergenov spıkerge saýal tastap, aýyldaǵy sý, svet, qoǵamdyq kólik máselelerin kóterdi. Joba kýratory tıisti sala mamandaryn tarta otyryp, máselelerdiń oń sheshimin tabýyna yqpal etetinin bildirdi.

​Sondaı-aq, qoǵamdyq qabyldaýda oblys turǵyndary onlaın túrde qoıǵan suraqtar boıynsha oblys ákiminiń birinshi orynbasary, joba kýratory B.Orynbekov tıisti sala mamandarynyń jaýaptaryn alyp, aldaǵy ýaqytta jaýap beredi.