Jambyl oblysy: «7-20-25» baǵdarlamasy boıynsha 34 ótinish maquldanǵan
TARAZ. QazAqparat - Jambyl oblysynda «7-20-25» ıpotekalyq baǵdarlamasyna júginetinder kóbeıip keledi, dep habarlaıdy QazAqparat tilshisi.
Eske sala keteıik, Elbasynyń bes áleýmettik bastamasynyń aıasynda Qazaqstan Ulttyq banki «7-20-25» ıpotekalyq baǵdarlamasyn bekitken bolatyn, onyń operatory «Baspana» ıpotekalyq uıymy» AQ. Jambyl oblysynda ústimizdegi jyldyń shilde aıynda jalpy quny 31 teńgeni quraıtyn nebári úsh ótinish tapsyrylǵan bolatyn.
«Bizdiń oblysta osy baǵdarlama boıynsha alty bank nesıe berip jatyr. Búgingi tańda jalpy somasy 410 mıllıon teńgeni quraıtyn 52 ótinish qabyldanyp, sonyń 34-i (284 mln teńge) maquldandy, 29 ótinish ıelerine jalpy somasy 247 mln teńge nesıe berildi. Bul rette «Bank Tsentr kredıt» kóshbasshy bolyp otyr, olar 28 ótinishti qarjylandyrǵan. Taǵy bir ótinishke nesıeni «ATF Bank» berdi. Qalǵan bankter bul baǵdarlamaǵa keıinirek qosylǵandyqtan, olardyń baǵdarlamalyq jasaqtamalaryn rettep alýyna ýaqyt kerek bolyp tur», - deıdi Ulttyq banktiń Jambyl oblystyq fılıalynyń dırektory Evgenıı Sharygın.
Jambyldyqtardyń «7-20-25» baǵdarlamasyna asa qyzyǵýshylyq tanytpaı otyrǵanyn mamandar óńir turǵyndarynyń tómen jalaqysymen baılanystyryp otyr.
Osyǵan deıin Jambyl oblysynda «7-20-25» baǵdarlamasy boıynsha alǵashqy jarnany tóleýge 400 mln teńge qarastyrylyp jatqandyǵyn habarlanǵan bolatyn.
