Jambyl oblysy: 4 myńnan astam kásiporyn medsaqtandyrýǵa ýaqtyly aqsha aýdarmaǵan
Bul oraıda tekseristi «Áleýmettik medıtsınalyq saqtandyrý qory»
KEAQ aımaqtyq fılıaly men Memlekettik kirister departamenti
birlesip ótkizgen.
Oblys ákimi Berdibek Saparbaevtyń tóraǵalyǵymen ótken jıynda «ÁMSQ» fılıalynyń dırektory Mavlıýda Boqaeva barlyq kásiporyndarda túsindirý jumystary júrgizilip jatqandyǵyn jetkizdi.
Jalpy, 2017 jyldyń 1 shildesi men 2020 jyldyń 30 sáýiri aralyǵynda oblys boıynsha qorǵa 9,6 mlrd teńge túsken. Onyń ishinde osy jyldyń sońǵy tórt aıynda túsken jarnalar men aýdarymdar kólemi – 2,4 mlrd teńge.
- Eger aǵymdaǵy jyldyń qańtar aıynda biryńǵaı jıyntyq tólem tóleýshilerdiń sany 20,9 myń bolsa, sáýir aıynda ol kórsetkish 168,4 myń adamǵa deıin ósti, - deıdi M. Boqaeva.
MÁMS júıesinde saqtandyrý mártebesine oblys boıynsha barlyǵy 1 134 506 adam ıe bolǵan. Bul týraly oblystyq densaýlyq saqtaý basqarmasynyń basshysy Marat Jumanqulov aıtty.
Aǵymdaǵy jyldyń 26 mamyryndaǵy málimetterge sáıkes, 3 531 adamnyń mártebesi anyqtalmaǵan. Osyǵan qaramastan, azamattardyń mártebesin ózektendirý boıynsha aımaqtar reıtınginde Jambyl oblysy aldynǵy qatarda.
- Baıqap otyrǵanymyzdaı, turǵyndar arasynda MÁMS mańyzdylyǵyn túsiný deńgeıi áli de joǵary emes. Túsindirý jumystaryn kúsheıtý qajet. MÁMS júıesiniń artyqshylyqtary týraly árbir azamattyń habardar bolýy asa mańyzdy, - dedi Berdibek Saparbaev.
Ol bir ret qana BJT tólegender boıynsha taldaý júrgizý kerektigin tapsyrdy. Sondaı-aq, qorǵa ýaqtyly jarnalar engizýge múmkindik beretin termınaldar ornatý qajettigin basa aıtty.
