Jambyl oblystyq PD bastyǵy qyzmet babynda qaza tapqan polıtseılerdiń otbasylaryna bardy

TARAZ. QazAqparat – Qazaqstan Respýblıkasynyń Táýelsizdik kúni merekesi qarsańynda Jambyl oblysy polıtsııa departamentiniń bastyǵy general-maıor Janat Súleımenov qyzmettik mindetterin oryndaý kezinde qaza tapqan jáne aýyr jaraqat alǵan polıtsııa qyzmetkerlerine qurmet kórsetti,- dep habarlaıdy QazAqparat tilshisi.

Naqtyraq aıtsaq, departament bastyǵy qyzmettik mindetterin oryndaý kezinde qaza tapqan Ǵazız Baıtasov, Polat Aıanqulov, Jandos Bekdaıyrovtyn otbasylaryna arnaıy at basyn burdy. Sondaı-aq, asa qaýipti qylmyskerdi ustaý kezinde aýyr oqtan jaraqat alǵan patrýldik polıtsııa batalonynyń ınspektory Bekjan Tilenchıevke baryp, kele jatqan merekemen quttyqtady.

«Bizdiń qyzmetkerlerimizdiń erlikteri búgingi polıtseıler úshin óz qyzmetindegi patrıotızm men janqııarlyqtyń úlgisi bolyp tabylady. Sizderdiń joldastyryńyz, ákelerińiz basqalardyń qaýipsizdigin qamtamasyz etý úshin óz ómirin qurban ete bildi. Halyqtyń qaýipsizdigi úshin óz janyn qıǵan batyrlarymyzdy eshqashan umytpaımyz. Olar árqashan bizdiń júregimizde, jadymyzda saqtalady»,-dedi general-maıor Janat Súleımenov qaza tapqan polıtseılerdiń týystary men jaqyndaryna.

Ol qaıtys bolǵan qyzmetkerlerdiń týystaryn áńgimege tartyp, jaı-kúılerin surap, balalarynyń tárbıesine kóńil bóldi. Máselen, Polat Aıanqulovtyń uly men qyzy karatemen aınalysady desek, olar búginde osy sport túrinen birqatar jetistikterge qol jetkizip úlgergen. Al Ǵazız Baıtasovtyń kishi uly Ádiljan fýtbolǵa qatty qyzyǵatynyn aıtty.

Sondaı-aq, Jambyl oblysynyń PD bastyǵy Bekjan Tilenchıevtiń shańyraǵynda bolyp, oǵan densaýlyq, qajymas qaırat, shydamdylyq tilep, tezirek saýyǵyp ketýine nıettestigin bildirdi. Onyń kerek máselelerin sheshýge kómektesetinin jetkizdi.

QR Táýelsizdigi kúnin merekesine oraı polıtsııa qyzmetkerleriniń otbasylaryna quttyqtaý hattary men gúl shoqtary tabys etildi.