Jambyl oblystyq máslıhatynyń quramy 76,7 paıyzǵa jańardy

TARAZ. QazAqparat – «Nur Otan» partııasynyń oblystyq fılıalynda jańa shaqyrylǵan oblystyq máslıhattaǵy partııa fraktsııasynyń alǵashqy otyrysy ótti,- dep habarlaıdy QazAqparat tilshisi.

Jıyndy partııanyń Jambyl oblystyq fılıalynyń tóraǵasy, oblys ákimi Berdibek Saparbaev ashyp, júrgizip otyrdy. Bul týraly partııa fılıalynyń baspasóz qyzmeti habarlady.

Bul joly saılanbaly organnyń 36 depýtatynyń 30-y «Nur Otan» partııasynan saılandy. Al, 3-i «Aýyl» HDPP, 3-i «Aqjol» QDP-nan ekenin atap ótken jón. Partııa oblystyq fılıalynyń tóraǵasy oblystyq máslıhattaǵy depýtattardyń sapalyq quramyna da toqtalyp ótti. Sondaı-aq, aımaq basshysy oblystyq máslıhattyń quramy 76,7 paıyzǵa jańarǵanyn tilge tıek etti.

Bul shaqyrylymdaǵy «Nur Otan» partııasy depýtattarynyń ishinde áıelder men jastardyń úlesi 40 paıyzǵa deıin ósken. Depýtattardyń 43,3 paıyzy bıznes, ónerkásip jáne aýyl sharýashylyǵy syndy ekonomıkanyń naqty salalarynyń ókilderinen turady. Oblystyq máslıhattaǵy «Nur Otan» partııasynan saılanǵan depýtattyq korpýs toǵyz ulttyń ókilinen jasaqtaldy. Olardyń qatarynda kópbalaly analar, múmkindigi shekteýli jandar da bar. Máslıhattaǵy depýtattardyń ortasha jasy 60-tan 48 jasqa deıin tómendedi.

Fraktsııa otyrysynyń kúntártibine saı partııa oblystyq fılıaly Saıası keńesi bıýrosynyń sheshimimen oblystyq máslıhattaǵy «Nur Otan» partııasynyń fraktsııa jetekshisi taǵaıyndaldy. Bul qyzmetti «QazFosfat» jaýapkershiligi shekteýli seriktestiginiń dırektory, Eńbek Eri Muqash Eskendirov atqarady. Munan ózge Farıda Júnisova, Gýlam Ýmarov jáne Arman Edilbaev syndy depýttatar oblystyq máslıhattaǵy turaqty komıssııalarǵa jetekshilik etpek.